EDITORIAL - Anti-Fake News Bill

Mas mapadali nalang unya ug mapasayon para sa mga kurakot nga mga opisyales sa gobiyerno ang pagpahilom sa media kun ipadayon ug ilang papasaron ang giduso nga balaudnon nga himuong salaod ang pagpakatap og fake news. Tinuod ug giangkon sa tanan nga ang fake news dili gyud maayo tungod kay daghan ang mga dili maayong sangputanan ang pagpakatap niini.

Apan kabahin man sa mga garantiya sa Konstitusyon sa Pilipinas ang gawasnong pagpadayag, nagpasabot nga hasta fake news o tinuod nga balita mahimo rang ipagawas, apan lahi-lahi og epekto.

Ang fake news klaro gyud kaayong gidesinyo aron moresulta sa kadaut sa uban o pagkaguba sa dungog niini. Mahimo sab kining gituyo aron ilaron o aron tabunan ang mga tinud-anay nga panghitabo.

Una sa tanan, dili monopoliya sa mga lehitimong media outfits ang pagpagawas og mga balita o impormasyon. Halos tanan, nigamit na sa social media aron magpakaaron-ingnong sakop sa media o basta lang maka posts.

Samtang tinuod dili perpekto ang lehitimong independenteng media outlets, apan nagpabilin kining matinud-anon sa propesyon ug dedikasyon aron iwadwad ang matuod nga panghitabo pinaagi sa pagbalita o opinyon aron mapahibalo ang katawhan sa mga isyu ug mga panghitabo sa nasud.

Ang mga sakop sa media mahimong ikiha og libelo o ba kaha cyberlibel sa mga tawong nasaypan sa gibalita, nagpasabot kini nga patas ra kaayo kay mahimo sab silang mapriso kun mapamatud-ang sad-an sa kasamtangang mga balaod nga naa karon ang nasud.

Sa pagkakaron giabusahan na og maayo ang paggamit sa mga pulong nga “fake news” matag dunay maigo sa balita.

Nakahibalo ba ang mga tawo kun unsa gyuy fake news ug kalainan niini sa misinformation ug disinformation?

Kun papasaron kining sugyot nga Senate Bill 1296 ni Senador Jinggoy Estrada, bisan kinsa nalang hasta kadtong mga kurakot ug mga abusadong kawani o opisyal sa gobiyerno o ba kaha kadtong mga adunahan nga dunay padrino sa gobiyerno kun komentaryohan o ma-expose ang mga kahiwian, pwede na kaayong mopasangil nga “fake news” ang migawas nga balita bahin kanila aron wala nay mopadayon sa pagbutyag sa ilang pagpangawkaw.

Dili ba ang mga lehitimong sakop sa media ang mitabang sa mga whistleblowers pag-expose sa mga kawatang elected ug appointed government officials? Taptan na hinuon ang baba sa media?