Mga tulay tukoron

Gidapit ko ni LTFRB-Region 6 regional director Richie Osmeña nga mobisita sa Iloilo City aron makasuroy sa mga nindot nga lugar sa Western Visayas.

Tuod man, kaniadtong Biyernes, ako ug kauban ko  nga media, gisuroy mi niya sa Roxas City kay duna may shooting competition.

Pagkaugma, Sabado, misakay mi’g barge paingon sa Isla sa Guimaras nga usa na karon ka probinsiya, ug miestar mi og duha ka adlaw.

Gisuroy namo ang nindot nga kabaybayonan ug kadagatan sa Guimaras luwan sa usa ka speed boat, ug may escort nga jetski.

Abi ninyo og nganong gisuwat nako ni? Gusto nako nga ipahibawo nga daghan pa gyud nga mga dapit dinhi sa nasud nga angay’ng suroyan.

Ang sagad sa mga daplin sa Guimaras susama gyud didto sa El Nido, Palawan nga sagad suroyan sa katawhan. Sa ato pa, kadtong di maka-afford pag-adto sa Palawan, pwede ra diay sa Guimaras.

Kay speed boat ug jetski man ang among gisakyan, sayon ra namo ang pagpidpid sa kadaplinan. Nadani mi sa usa ka dapit nga sa ibabaw daghan kunong unggoy, kay ang tubig sa dagat tin-aw kaayo.

Ang among guide, migiya kanamo sa usa ka dapit sa bukid daplin sa dagat nga mora’g may liki. Sus, pagduol namo, nakita namo nga ang dakung liki diay, ganghaan paingon sa usa ka langob.

Misu’d mi sa ganghaan sa langob ug nakita namo nga ang dagat miabot diay sa ilawom, ug duna pay mga bas didto sa sulod.

Sus, kon dinhi pa kadto sa Cebu, gipuy-an na tingali’g tawo kay dako kaayo og wanang sa sulod ug hayag ra.

Sa mga dili suheto sa maong lugar, di ka gyud masayod nga may langob ba diay didto nga dako’g wanang nga pwedeng kapuy-an.

Unya, sa pagsige namo og waldas-waldas sa mga karsada sa Guimaras, nakabantay gyud ko nga lapad kaayo ang ilang mga karsada.

Bisan og pipila ra ka sakyanan ang imong makita nga magdagan sa karsada, apan tag-upat ka lanes ang karsada nila ug nindot pa kaayo pagkaatiman.

Kay tabokonon man og dagat ang Guimaras gikan sa Iloilo, dunay plano ang kagamhanan maghimo og tulay nga magdugtong sa Iloilo ug Guimaras.

Gani may plano pa gyud nga gikan sa Guimaras ilahos ang taytayan paingon sa Bacolod, ug moabot kuno og 32 kilometros ang tulay nga giingong sugdan pagtukod sunod tuig, kon madayon.

Nagsige lang hinoon og uswag-uswag ang pagsugod niino nga project, una ang tulay gikan sa Iloilo paingon sa Guimaras, ug dayon gikan sa Guimaras paingon sa Bacolod.

Sama usab sa plano nga magtukod sab og taytayan nga magdugtong sa Cebu ug Bohol. Kanindot kon kining maong mga proyekto mahinayon.