22 mil pesos nga ukay scam lang diay

Kagahapong adlawa nakadawat ko og message gikan sa akong paryente sa Mindanao mahitungod sa nahitabo sa iyang order nga ukay-ukay gikan sa usa ka supplier nga nag base sa dakbayan sa Toledo.

Nakaila ila lang sila pinaagi sa social media diin gi-offer sa supplier ang barato nga presyo ug dali kuno ma-deliver ngadto sa mga mopalit sa produkto.

Tungod sa ka maayo mobulatik sa nagpailang supplier nadani gyud ang akong paryente, ni-order og bulto nga supply sa ukay-ukay kay ibaligya pud nila didto sa Bukidnon.

Moabot sa P22,000 ang gipadala niini via money transfer ug gipasaligan nga mapadala ang supply. Apan moduha ka bulan naman lang wala man gyud moabot ang gipalit nga ukay-ukay.

Dihang gi-follow up niya, mo-reply man via messenger ang nagpailang supplier nga natanggong sa forwarding company. Gipangayoan niya og tracking number apan walay ikahatag.

Dili pud mohatag og cellphone number kay tawagan unta, ang communication lang nila sa messenger. Sa ingon ini pa lang kadudahan na kaayo.

Ang social media page wala na usay nakabutang nga mga detalye ug dili masendan og mensahe.

Giingnan nako ang akong paryente nga ayaw nalang laumi nga dunay moabot nga supply sa ukayukay kay na modus na siya. Nawagtang na ang ilang kwarta, 22 mil pesos dako na na nga kantidad sanglit kita usab kato sa ilang gamay’ng negosyo ug nakuha pa gyud sa scammer.

Pastilan karong panahona mas mahadlok ka sa mga kriminal nga anaa sa online o cyber world kay gamay’ng sipyat lang pwede na silang mo-takeover ug dili nalang mahibaw-an nabiktima ka na.

Mahibulong nalang ta nga adunay mo-email o mo-text ug motanyag sa bisan unsa nga makatintal  aron tuplokon ang link, o kaha kombinsehon ka aron mopalit sa ilang produkto.

Sa akong cellphone lang daghan kaayo mo-text nga klaro kaayo nga scam. Akong i-block number apan dili man sila mawagtang busa ang angayang himoon dili gyud mopatol sa bisan unsa nga madawat nga mensahe o offer kay sure gyud ka mabiktima.