Dear Atty. Divine,
Dunay yuta ang akong papa ug nagtinguha siya sa pagbaligya niini. Misupak kaming mga anak tungod kay sayang man gud nga mapunta sa laing tawo ang maong yuta. Apan desidido man gyud ang among amahan sa pagbaligya niini. Ang akong pangutana kun mamahimo ba kaming mga anak nga mobabag sa tinguha sa among amahan sa pagbaligya sa maong yuta? Unsa may angayan namo nga buhaton? Daghang salamat. — Danny
* * *
Dear Danny,
Kun ang maong yuta conjugal o napalit sa imong mama ug papa atol sa ilang kaminyuon unya ang inyong mama mitaliwan na, then kamong mga anak adunay katungod nga mobabag sa tinguha sa inyong amahan kay portion sa maong property kamo man ang tag-iya isip sumusunod sa share sa inyong inahan. Apan kun buhi pa inyong mama, di gyud mo kabuot kay ang inyong amahan ug inahan isip maoy mga tag-iya sa property mao gyud ang maka-decide niini ug di makapanghilabot ang mga anak. Apan kun pananglit ang maong property exclusive property sa inyong amahan kay iya kining na-inherit gikan sa iya sab nga mga ginikanan then dili gyud mo makapanghilabot sa desisyon sa inyong amahan nga ibaligya ang maong property kay siya man ang tag-iya niini. Ang katungod sa anak sa property sa iyang mga ginikanan mahinog lang kun patay na ang iyang mga ginikanan. Ang maayo ninyong buhaton mao ang pagkombinser nalang sa inyong amahan nga kamo nalang mga anak ang mopalit sa maong property sa reasonable nga presyo aron dili mapunta sa lain ang maong yuta. Hinaut nga akong natubag ang imong pangutana. Thank you and God Bless. — Atty. Divine
* * *
Alang sa inyong pangutana, palihug lang sa pag email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.