Pilipinas gihimo rang training ground sa nurses

Mahal kaayo ang kursong nursing. Magbaguod gyod ang mga ginikanan sa kabug-at sa galastohan sa gipaeskuyla nilang anak. Apan subo palandungon, nga dihang na-professional nurse na kini, nakatrabaho man tuod dayon sa ospital o pribadong kompaniya. Pero, gamay ra og suweldo.

Pipila kanila, migraduwar ‘cum laude.’ Pag-take og licensure exam, mi-top. Sa nakatrabaho na, labi na nadestino sa mga mahalong tambalanan, mikayod pag-ayo. Wala panumbalinga, ang sagad moabot sa 16 oras nga serbisyo ug usahay dili na maka-day-off tungod sa ilang gugma sa nahuptang propesyon. Apan pabiling anemic ilang suweldo.

Akong higalang pinanser, iyang anak nars dugay nang nagtrabaho sa pribadong ospital. Maayo’g performance. Sige lag overtime. Usahay maka-straight pag 24 oras tungod sa kakulang sa manpower sa maong ospital. Apan way asenso. Permanenting gamay ang suweldo. Resulta?

Panahon sa pandemiya, gihayir iyang anak sa usa ka ospital sa Texas, diin sa pagpirma pa lang og signing contract, nakadawat na’g dolyares. Iyang monthly income? Layo ra ang kanhi gitrabahon niyang ospital dinhi sa Sugbo. Ug dili kay siya ray mibalhin-abroad. May daghan pang misunod.

Pag-umangkong nurse ni misis, tungod sa kakugihan gi-promote nang head nurse sa sikat-pribadong tambalanan nga gidumala sa mga madre. Pero, wala mawili, mibiya dayon sa Pilipinas dihang may dakong oportunidad nga nagpaabot niya sa Canada.

Grabe mokayod mga nurse dinhi sa ato. Overloaded pirme ang gipas-ang kaakohan kada adlaw. Unya, dili well-compensated. Pero ila kining giantos. Kay sagad kanila, mipakasama sa gialagaran nilang ospital nga usa ka training ground. Diin, kon daghan na silag nakat-onan, mo-abroad gilayon sa datong nasod ug didto na motrabaho.

Niining bag-o, gipahibalo sa Department of Health nga nagkinahanglan atong nasod og 100,000 kapin ka nurses ug health workers. Ug magpadayon kadako kining maong shortage kon magpabiling bungol atong gobiyerno sa hagbay rang giyangongo sa nurses – ang tukmang gidak-on sa gipangandoy nilang salary increase.

Ug mahatag kaha kini sa atong pangulo, diin usa sa iyang mga plataporma sa miaging piniliay mao ang pagpadako sa gamayng suweldo sa atong nurses ug health workers? Buwahan, daghang Overseas Filipino Worker maingganyo sa pagpauli ug dinhi na sa ato mangalagad?

Atong paaboton, unsay iyang next move?