Dunay elepante sa iyang kuwarto. Pero nagdumili siya pag-angkon sa presensiya sa higante. Nagyawyaw siya kinsay way ligo sa iyang mga kauban bisan klaro nga ang elepante maoy nangalisbo. Namanghag siya nga puwerteng hugawa sa kuwarto sa way pag-ila nga ang elepante maoy nagbawon sa tanang lapok.
Nisugo siya nga ablihan ang mga bintana aron mahayahay bisan kon natabonan sa elepante ang tanang lutsanan sa hangin. Gipangasab-an ang iyang kaubanan nganong wa manilhig bahala na nga di silang kaambas sa elepante nga nagpatuyang og habwa sa iyang hugaw.
* * *
Ang determinadong paglingiw sa elepante nakaaghat ni Bise Presidente ug Education Secretary Sara Duterte Carpio pagrekomendar sa mosunod nga mga sulbad sa iyang gideklarar nga krisis sa edukasyon:
• Imbes sulbaron ang kakuwang sa mga magtutudlo (147,000 ang kinahanglang i-hire), molusad siya og programa pagsugo sa mga ginikanan sa pagtabang pagtudlo sa ilang mga bata;
• Imbes sulbaron ang kakuwang sa classrooms (91,000 ang alkanse), gisugo niyang padayon nga pagtudlo sa mga bata bisan human nang school year ug atol sa ilang bakasyon;
• Imbes sulbaron ang kakuwang sa armchairs (bisan monobloc chairs nga way armrests nay gipada sa pipila ka eskuylahan), nisugo siya sa mga magtutudlo pagduaw sa kabalayan sa mga tinun-an; ug
• Imbes sulbaron ang kakuwang sa textbooks (bisan sa P1.178 bilyones nga gahin way librong napalit sa 2021), molusad siya og national reading program pinaagi sa Brigada Eskwela.
* * *
Hinaut nga ang dako niyang confidential funds nga P650 milyones sa 2023 makatabang niya paghipos og kasayuran nga momatuod sa kataphaw sa iyang mga programa.
Hinaot nga ang mahipos nga intelligence information makahatag niya og igong intelligence sa pagtimbakuwas nga masulbad lang ang krisis kon subayon ang gamot nga mga hinungdan.
* * *
Beterana sa paglingiw sa elepante si Carpio. Sa mayor pa sa Davao City, gihudlat niyang mga terorista ug mga komunista bisan mas daghang giluba sa Davao Death Squad nga gidudahan sa International Criminal Court nga gipasiugdahan sa iyang amahan.
* * *
Kuyaw nga sa kadako sa kuwartang magasto nga way resibo, matental siya pagsabotahe sa posibleng mga kaatbang sa 2028. Kay di man kabadlong, peligro nga mahimong kabahin sa elepante nga mohasi sa nasud ug katawhan.
* * *