Gihimong sulogoon

Gipasidan-an ni Senador Raffy Tulfo ang kadagkoan sa Department of National Defense (DND) nga badlongon ang mga mga opisyal sa militar nga sagad mogamit og mga sundalo isip ilang sulogoon sa panimalay.

Ang Officer-in-Charge (OIC) karon sa Department of National Defense nga si Jose Faustino Jr. giingnan ni Senador Tulfo nga nakabantay siya dihang mibisita siya sa mga kabalayan sa pipila ka heneral nga daghang sundalo sa ilang balay.

Sigurado ko nga kining maong sitwasyon susama usab sa ubang opisyal sa kapolisan nga ang mga polis gidestino sa ilang balay isip mga guwardiya.

Maayo unta og wa na kining maong sistema nga nabantayan usab nako kaniadto dihang reporter pa ko nga nadestino sa kapolisan.

Nakakita man gud ko og dukomento kaniadto nga nagpakita kon asa gipangdestino ang mga polis sa usa ka unit, ug nakita nako nga daghan ang gidestino isip mga guwardiya sa balay sa opisyal.

Para nako, ang regional commander pwede nga dunay mga police back-up, apan kon ang tanan na lang opisyal sa kapolisan dunay mga guwardiya ang ilang balay, nga maoy nahitabo kaniadto, dili na usab tingali maayo.

Ngano man? Imbes magamit ang mga polis aron mapatunhay ang kalinaw, gigamit na man hinoon sila nga mura og guwardiya sa balay.

Maayo unta og makorehian kini karon sa administrasyon ni Presidente Bongbong Marcos.

* * *

Nagpa-renew ko sa akong driver’s license niadtong Martes ug nakasinati na gyud ko unsa ka lisud ang pagkuha og examination sa online.

Nakaingon ko nga lisud, dili nga lisud tubagon ang mga pangutana aron sutaon kon sinati ba sa mokuha og lisensya ang balaod sa pagmaneho og sakyanan.

Ang gipasabot nako nga lisud ang pagpasar sa examination mao nga dunay limit nga pipila lang ka minutos ang gigahin sa pagtubag nimo sa 25 ka pangutana.

Papilion ka kon ang pangutana ipaagi ba sa English o Tinagalog. Sa una nako nga pag-take, wa ko makapasar kay milapas ko sa mga tres minutos ra man tingali ang gidugayon.

Giingnan nako ang personnel sa LTO nga kon mao man gani ni, sigurado ko nga daghan ang dili makatubag. Kon manubra ka sa oras, balik ka sa sinugdanan, hangtud nga makapasar ka. Kusog na man gyud ko mobasa ug mosabot pero kaduha ko nga misaylo, ug sa ikatulo na nakong examination nga nakapasar ko. Nagkatawa ko uy, kay daghan baya ang hinay’ng mobasa.

Pero kon adto sa balay patubagan ang examination pinaagi sa online, lagmit nga matikasan ang LTO kay posible man nga lain ang motubag sa mga pangutana. Sa ato pa, way kapuslanan ang online examination. Maayo nga pareho sa ako, nga didto gyud mi-examine sa LTO.