Dear Atty. Divine,
Duna koy pangutana labot aning among gipuy-an nga yuta. Kapin sa 30 ka tuig na nga nagpuyo ang akong mga ginikanan aning yutaa ug sa dihang sila namatay kami ang mipuli sa pagpuyo. Sa dihang buhi pa si mama, siya sab ang nagbuhis aning yutaa. Ang akong pangutana attorney kun mamahimo ba namo nga maangkon kining yutaa kay dugay na man kami nga nagpuyo niini? Basi sa among nahibaw-an ang tag-iya aning yutaa atua na nagpuyo sa gawas sa nasud lakip na ang ilang mga anak. Unsay among buhaton aron among maangkon kining among gipuy-an? Daghang salamat. —Sam
* * *
Dear Sam,
Kun dunay private owner ang yuta nga inyong gipuy-an, bisan kun pila ka tuig pa mo nga gipasagdan sa tag-iya sa pagpuyo niini, dili gyud ninyo maangkon ang maong property kay aduna na man kini tag-iya. Kun unregistered land pa kana or wa marehistro ang yuta sa pangan ni bisan kinsa mamahimo ninyo kanang aplayan aron inyong maangkon tungod sa inyong pag-okupar niini sa dugay na nga panahon. Apan lahi man ang sitwasyon anang inyong gipuy-an kay aduna may tag-iya daan. Magpasalamat gani mo nga gipapuyo mo nga wa mo pabayra ug abang apan kun moabot ang panahon nga kuhaon na kana sa tag-iya kay ila nang gamiton mapugos gyud kamo sa pagpahawa og pagbakante sa maong luna. Ang bugtong paagi aron maangkon ninyo ang maong yuta nga inyong gipuy-an karon mao ang pagpalit niini gikan sa tag-iya kun mosugot sila nga inyo nalang bayran kanang yutaa. Mas maayo nga inyong susihon kun kinsa ang tag-iya niana ngadto sa Assessor’s Office aron kun makakwarta mo inyong tanyagan nga inyo nalang kini nga paliton aron di na mo mapapahawa nianang maong lugar. Thank you and God Bless! — Atty. Divine
Alang sa inyong pangutana, palihug lang sap ag- email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.