Oo pero

Gipagawas ni Cebu Governor Gwendolyn Garcia niadtong Septyembre 21, 2022 ang iyang Executive Order Numero 36 nga nagmando sa mga tag-iya ug tagdumala sa mga fixed ug floating cottages sa lungsod sa Cordova sa pagguba ug pagkuha niini.

Ang mga tag-iya sa fixed ug floating cottages anaa lamay hangtod sa Oktobre 4, 2022 sa pagguba ug pagkuha sa ilang mga estraktora.

Gimandoan sa gobernadora ang Philippine National Police, Police Maritime Group, Philippine Coast Guard, Naval Forces Central and Maritime Industry Authority sa estrikto nga pagmonitor ug pagpatuman sa iyang kamandoan.

Ang hukom sa gobernadora naumol human nahugaw ang dagat sa lungsod sa Cordova nga miabot sa punto nga dili na puwede nga makaligoan tungod sa ka taas sa level sa fecal coliform nga gikan sa hugaw sa tawo nga gikan sa pansayan sa mga fixed ug floating cottages nga gilabay ra usab sa dagat nga dili layo sa nahimotangan niini.

Si Cordova Mayor Cesar “Didoy” Suan mitug-an nga adunay 103 ka mga floating cottages ug sobra sa 300 ka mga fixed cottages ang nag operate sa ilang lungsod.

Usa sa mga operators sa floating cottages nga si Mabel Daro mitug-an nga migasto sila og P150,000 ngadto sa hapit tunga sa usa ka milyon ka pesos sa ilang pagpahimo sa mga cottages.

Hinuon ang gobernadora miingon nga puwede ra nga makabalik ang operasyon sa floating cottages pero kinahanglan una nila kining kuhaon sa dapit. Makabalik lamang usab kini kun dili na kini makahugaw sa dapit ug luwas na usab kini.

Kun pabalikon man ang operasyon sa floating cottages nganong papahawaon pa man kini ug gub-on? Nganong dili naman lang ni pabotangan og septic tank. Pagkaluoy ba pod sa mga operators nga mogasto napod og dako sa ilang pagpahimo og usab sa mga floating cottage.