Magsugod na ang Cebu City Police Office (CCPO) sa pagpanakop (rescue) sa mga menor de edad nga manaygon ug magpakilimos sa kadalanan kay samtang nagkaduol na ang Pasko, nabatyagan usab nga nagkadaghan ang mga bata diha sa kadalanan. Kalipay sa kabataan ang pagpanaygon, bisan sa tataw nga risgo sa ilang kinabuhi. Kadaghan na buhata kini’ng maong kampanya apan padayon ang “cat-and-mouse” nga kahimtang sa kapolisan ug kabataan. Kay matud pa sa pagya, “Kon ngisi-han gani sa ilaga ang iring, nagpasabot kana nga adunay lungag sa iyang duol nga kataguan”. Tua ra!
Mas brayt ang baboy
Nangayo’g tabang sa kagamhanan ang mga hog raisers sa nasud luyo sa kalisod nga nasinati sa maong lokal nga industriya gumikan sa nagdabos nga imported nga karne’ng baboy ingon man sa padayong pagtibugsok sa balor sa peso itandi sa dolyar ug sa pagtaas sa production cost. Sayod kita nga ang baboy karon, baboy gihapon ugma ug magpabilin kining baboy hangtod sa hangtod. Apan dili lang unta mag-binaboy ang mga anaa sa kagamhanan nga maoy gitahasan sa pag-atiman sa maong industry aron dili kita ma-igo sa pagya nga, “Ang baboy mas brayt pa kay sa iro, ug ang duha, mas brayt pa kay sa Kongreso”. Madahaan!
Dako pa’s sweldo
Namahayag si Marikina Representative Sheila Quimbo nga nagkinahanglan ang kagamhanan og dili momenos 6,000 ka mga doctor ug 4,000 ka mga nurses alang sa padayon nga pagpakigbatok sa COVID-19 pandemic. Tungod sa kagamay sa sweldo alang sa maong mga propesyon, giangkon sa kongresista nga maglisod ang gobyerno pagkumbinser sa mga doctor ug mga nurse sa pagpanarbaho sa gobiyerno. Mas palabihon nila ang molangyaw tungod kay sa gawas, madawat nila ang suhol bugti sa ilang kakugi. Dinhi sa Pilipinas, masagmuyo ka’ng magtan-aw nga ang presyo sa sapatos sa tindahan mas dako pa kay sa imong sweldo. Fezteleern!
Duha na’y sayop
Mirekomendar ang pundok sa mga environmental advocates ngadto kang Cebu City Mayor Michael Rama nga inay Waste-to-Energy (WTE) Facility ang tukoron, disiplina ug strikto’ng pagpatuman sa R.A. 9003 o Ecological Solid Waste Management Act of 2000 ang angayan’g buhaton. Nagkalain-lain ang argumento kabahin sa WTE, adunay supak ug adunay pabor. Mahimong paminawon sa kagamhanan ang sugyot sa mga environmental advocates. Apan dili ba kaha unya sila mahisugamak sa panultihon nga “Kon mouyon ko nimo, kita na’ng duha unya ang nasayop”? Paleho la!
Dili hingpit ang kalipay
Mipasalig ang pundok sa mga sugar producers sa Pilipinas nga makasinati kita’g usa ka “White Christmas” kay mokunhod na ang presyo sa asukal atol sa Pasko ngadto sa P70 - P80 matag kilo. Moabunda na tingale ang asukal apan mahal gihapon alang sa kadaghanan ang P 70 - P 80 matag kilo nga presyo niini. Dili hingpit nga “White Christmas” ang masinati sa katawhan. Alang sa mga negosyante, haum kanila ang awit nga “Joy to the World”; apan alang sa mga konsumidor nga nagping-it sa kamahal sa palaliton, “Silent Night” ang haum nila’ng kantahon. Pagkatoytoy