Septiyembre 4, 2022: Ikakawhaag-tulo nga Domingo sulod sa tuig
Mga Pagbasa: Kin. 9;13-18b/Sal. 90/Fel. 9-10,12-17/Lk. 14;25-33
Matag usa kanato dunay pryoridad sa atong kinabuhi. Ang atong pagpili mao man ang mohulagway sa atong pagkatawo ug sa atong baruganan.
Kay kun hain gani kadtong giisip natong mahinungdanon seguro kita nga kadto atong pilion. Apan atong hinumdoman kining mosunod:
1. Nga dili kini mahitungod sa pagkab-ot sa atong mga tinguha. Hinunoa lakip usab niini ang hustong pagplano ug pagtimbang timbang sa dili pa mohimo og lakang.
2. Ang pag-angkon nga dunay mga limitasyon bisan gani sa atong mga desisyon. Lakip na niini ang pangutana kun makasugakod ba ang atong bahandi, manpower, talent aron makab-ot ang atong mga gitinguha.
3. Ang pagpaubos balaanon ug makatabang kanato aron mahalikay kita sa kaulawan ug pagbiay biay tungod kay nagpatuga kita bisan og dili nato kaya.
4. Mas makaayo alang kanato nga himoon ang kabubut-on sa Dios nga maoy sukaranan usab sa atong mga tinguha ug mga damgo. Ang Dios unta ang atong pryoridad labaw sa tanang mga butang.
5. Bisan unsa nga atong nahimong trabaho gasa sa Dios busa angayan lamang nga bisan nga buot natong makab-ot pinaagi sa atong trabaho atong ihalad ngadto sa Dios.
Lihok nato karong semana
1. Atong basahon ug pamalandongan ang Salmo 139 inig mata nato sa buntag karong semanaha.
2. Alagari ang Dios pinaagi sa pag-alagad sa uban.
Atong hinumdoman nga kun ang Dios atong pryoridad ang tanan sayon na lang gyud alang kanato.