Nagpasalamat ako sa Ginoo sanglit aduna man akoy personal nga kasinatian ni Cardinal Tagle bisan daklit lamang. Nahitabo kadto sa dihang gihimo didto sa UST Manila ang tulo ka mga adlaw sa seminar sa Ministry on Exorcism and Deliverance. Gani duna koy hulagway uban niya ug ni Fr. Jocis Syquia ang chief exorcist sa Manila. Buotan si Cardinal Tagle, lantip og pangisip. Simple nga tao. Diha ko bilib niya. No wonder kun nganong tua na siya sa Roma aron motabang kang Papa Francisco sa pagdumala sa Simbahang Unibersal.
Ning mga nangaging adlaw nahimong hilisgotan ang usa ka taho nga si Cardinal Tagle nahimong usa sa mga nag-unang kandidato nga mohulip kang Francisco kun ugaling ang maong papa mo retiro. Daghang mga Pilipino ang nangalipay ning maong kalamboan ug gani ang nihimo og pag post and share niini sa social media. Sa akong bahin maayo apan ang pagpakita og support aron siya mamahimong Santo Papa murag dili pud haom. Kini tungod ning mosunod nga mga rason:
1. Una, wala tay gahom sa pagdasig sa mga Cardinal nga siya gyud ang pilion, ang College of Cardinals lamang ang makahimo sa ingon.
2. Ikaduha, dili kini politika. Diin pagapilion ang mamahimong papa segun sa kasikat. Usa kini ka sagradong akto sa mga cardinal nga mopili sa papa panahon sa usa ka conclave.
3. Ikatulo, buhi pa ang kasamtangang Santo Papa ang pagpangandoy nga dunay mopuli kaniya mora’g mosalamin sa tinguha nga siya mahanaw na, moretiro ba kaha o wala ba makauyon sa paagi nga gidumala niya ang Santa Iglesia.
4. Ikaupat, mas makaayo nga iampo nato ang kasamtangang papa nga unta magiyahan siya.
5. Ikalima, dili lalim mamahimong papa. Gani ang mga napili mohilak gumikan sa kabug-at sa maong responsibilidad. Sama ra nga atong gihatagan og bug-at nga palas-anon ang atong isig ka Pilipino nga Cardinal Chito.
Atong iampo si Francisco ang alagad sa mga alagad sa Dios.