Paraiso nga pang masa ang gasto

Nanuroy kami sa akong pamilya sa habagatang bahin sa lalawigan sa Sugbo niadtong weekend diin nakita namo ang matahom nga talan-awon sa among gipang-agian nga lungsod, nahingangha lang kami ilabi na ang mga bata mga nakita nila sanglit unang higayon nga nakabiyahe sila og midyo layo human sa pandemic.

Daw nakaginhawa ang pamilya sa biyahe namo sa probinsiya nga daw nibalik kami sa panahon nga wala pa moabot ang pandemic kay sa mga dapit nga among giagian balik naman sa normal ang kalihokan sa mga tawo. Wala nay makita nga mga tawo nga nag-mask, in fairness nindot man pud gyud ang huyohoy sa hangin sa probinsya nga hanggabon sa mga tawo ilabi na sa matahum nga baybayon sa kadagatan.

Usa ang lungsod sa Badian ang among naadto diin nahimutang ang matahom nga kaligoanan o beach nga walay kalainan sa mga nabantog nga beach sa nasud sama sa Boracay ug Panglao.

Ang Lambug Beach nga gikuha ang ngalan sa ilang barangay, nahimutang kini sa sudlonon nga bahin gikan sa lungsod. Apan dili ikamahay ang taas nga biyahe tungod sa murag paraiso nga katahom sa dapit.

Tin-aw, limpyo ug blue nga dagat ang moganoy sa mga tawo nga magtampisaw, unang higayon nako nga nakaabot sa dapit ug mismo ako nakadayeg sa kanindot sa ilang beach.

Labaw sa tanan dili pa sila dollar rate didto, ma-afford pa sa mga local tourist ang galastohan sama sa bayad sa cottage nga kasarangan lang mo-range og P500 ngadto sa P1,000 ang abang, ug ang entrance sa pagsulod sa beach tag P10 ang per head walay labot ang mga bata.

Kong gusto moestar didto ug pipila ka adlaw mahimo ra usab sanglit adunay mga pinuy-anan nga nagtanyag og kapuy-an nga ang bayad per day usab nga mahimong makagamit ka sa tanan nga butang sa balay apil ang lutoanan. Mamalit lang ka og mga sud-an nga lutoon isulod sa ilang freezer mora naa ra gyud ka sa imong balay nga gitawag nila og home stay. Ang bayad depende ra pud sa sabot.

Nakaingon ko nga naa ra man diay ning world class nga beach sa Lambug nga pang masa pa ang gasto busa highly recommender nako kini sa mga Sugboanon o bisan kinsa nga gustong manuroy.

Dili na kinahanglan nga moadto pa sa laing dapit o sa abroad kay sa barangay Lambug sa lungsod sa Badian pa lang matagbaw ka na. Ang mga tagong paraiso sa atong mga dapit sa Sugbo anaa ra nagpaabot nga madiskobre, natoltolan naman seguro kini sa uban apan anaa pay daghan nga wala pa kaadto bisan gani kadtong anaa ra Sugbo busa bisitaha ninyo ang nakatagong paraiso.

Manghinaut lang kita nga dili mausab ngadto sa dollar rate ang matahum nga paraiso ug magpabilin nga maabot ang presyo sa tanan aron matilawan ug masinatian pa kini sa kadaghanan.