Kinsay labing angayan?

Ugma puhon, Mayo 9, mao ang makasaysayanon’g adlaw diin ang katawhan mopili na usab sa mga opisyales nga mohupot sa renda sa pangagamhanan uban ang paglaom nga ang mapili magdala kaniya ug sa iyang nasud ngadto sa kabulahanan. Ang pagpili sa kandidato mapanag-ing nato sa usa ka aplikante sa trabaho diin adunay rekisito’ng kwalipikasyon nga gipahaum sa posisyon. Mahinungdanon nga tun-an ug tuki-on pag-ayo ang kwalipikasyon sa botaran, kay lage, ang pagbotar balaan nga katungod ug katungdanan ug dili mahimo’ng yamâ-yamâ-an.

Makapahinumdum kini kanako sa sugilanon sa upat ka aplikante sa nag-inusarang posisyon nga Store Manager sa usa ka dako’ng hardware store.  Agi’g pagsukod sa ilang katakus, gipangutana ang upat ka aplikante og usa lamang ka pangutana: Unsa ang labi’ng paspas nga butang o panghitabo sa kalibutan? Ang una mitubag nga “hunahuna” o “ideya” ang labing paspas kay mokalit lang kuno kini pagtumaw sa atong galamhan.  Ang ikaduha, mitubag nga “pagpamilok” sa mata ang labing paspas kay usa kini ka kalit nga reflex action sa mata. Ang ikatulo mi-insister, dala panghambog, nga “kahayag” ang labig paspas kay matud pa niya, inig-kablit kuno niya sa switch, modan-ag gilayon ang kahayag ug maaninaw gilayon niya ang kalapdon sa ilang kayutaan samtang nagbarog siya sa ilang beranda.

Apan ang ika-upat nga aplikante sukwahi ug daw bugal-bugal ang tubag sa pangutana.  Matud pa niya, ang labing paspas nga butang o panghitabo sa kalibutan mao ang “diarrhea” o “kalibangâ”. Sa dihang mobahakhak na unta sa kahimout ang nag-interview, gipasabot dayon siya sa aplikante sa pag-ingon nga: “Gahapon man gud Sir, naghatud ko dinhi sa akong aplikasyon.  Apan sa kalit lang, midaguok ang akong tiyan nga daw gipanuhot.  Busa midali-dali ako pag-adto sa pansayan, apan dimalas lang kay wala pa gani ko kahuna-huna, wala pa gani ka-pamilok, ug wala pa gani nako makablit ang switch sa suga, mibuhagay na ang hugaw sa akong sampot.  Naunhan kining tanan sa akong “diarrhea”.

Maingon nato nga kataw-anan ang maong tubag. Apan kon atong tukion pag-ayo mipadayag kini’g mga hiyas nga angay hinuklogan.  Una, makita nato ang pagkamatinud-anon sa maong aplikante kay luyo sa maka-uulaw nga kasinatian, iya gihapon’g gisaysay ang matuod.  Ikaduha, ang iyang tubag nagagikan sa iyang kasinatian.  Dili malalis nga mahinungdanon ang kasinatian sa atong pagpanarbaho.  Ikatulo, aduna siya’y talagsaon’g kalantip sa panghunahuna kay tataw kaayo ang logic sa iyang tubag.  Ikaupat, aduna siya’y gitawag nga “sense of humor”, usa ka hiyas nga kinahanglan gayod kon ikaw mangalagad sa katawhan.

Adunay upat ka kandidato karon nga nagpapili pagka-kongresista sa Cebu City North District.  Sa akong ubos nga panglantaw, ang maong upat ka mahinungdanon’g hiyas, Pagka-matinud-anon, Kasinatian, Kalantip sa Hunahuna ug “Sense of Humor”, gibatonan sa kandidato nga si Atty. Aven Piramide, ang bugtong abogado sa upat ka kandidato.  Siya ang naghupot sa kompleto ug haum nga kwalipikasyon sa pagka-Kongresista.  Ang hataas nga kutay sa iyang kasinatian isip magbabalaod, ang kalantip sa iyang salabutan nga gipamatuod sa iyang nadawat nga mga pasidungog, ug ang iyang kalarino motabi ug mopadayag sa iyang hunahuna, maoy dayag nga bentaha nga naghimo kaniya nga angayan sa pagsalig sa katawhan. Sa giingon ko na sa unahan, ang atong pagpili’g kandidato dili angay yamâ-yamâan.  Kon sa buwangan mopili ug mopusta kita sa manok nga barugan, sa Kongreso, labaw pa nga kinahanglan’g mopili kita sa matinud-anon, maantigo, lantip, larino ug may kasinatian. Dili malalis ang katakus ug ka-angayan ni Atty. Aven Piramide nga mamahimong kongresista sa Cebu City North District.  Karon pa lang gani, iya na’ng gilatid na ni Atty. Aven Piramide ang maanindot nga plataporma, programa ug mga balaodnon nga iyang pandayon alang sa kaayohan sa tanang sektor sa katilingban kon siya matuboy sa maong katungdanan.  Dili sama sa uban nga wala gani tingale masayod kon unsa ang buot nila nga pagasudlan.  Fezteleern!