Padre Giovani mokumpisal ang nasud

Niadtong bata pa ako, mahiligon ko og pagpaminaw og drama. Usa sa mga paborito nakong magsusulat kaniadto mao man si Fermin Collantes Gomez. Duna to siya’y drama nga nag ulohan: “PADRE GIOVANI, MOKUMPISAL ANG NASUD. Ug sa tinuod lang gawas sa mga sanglitanan sa mga PME Fathers nadasig ko sa maong drama mao nga nakahukom ko nga mosulod sa seminaryo.

Daw langit alang Kanako ang pagsul-ob og sotana kaniadto. Ug tuod man napari gyud ko human sa hataas nga panahon sa pagtuon sa seminaryo sa wala damhang hitabo.ug hangtud karon nialagad gihapon ako isip pari bisan dili takus. Mga napulog-unom na ako ka tuig ug sulod ning maong mga tuig daghan ko og nakat-onan.

Kini naglangkob ning mosunod:

1.    Kaniadto nagdahum ako nga kun unsay dunay kalambigitan sa mga butang espirituhanon kinahanglan adto ra gyud ko molihok kay ang pari naghisgot man sa mga butang espirituhanon. Apan karon akong nakita nga dunay mga butang kalibutanon nga kinahanglang panginlabotan ginamit ang espirituhanong prinsipyo.

2.    Maayo nga ang pag-ampo atong paubanan og buhat. Ang pag-ampo sinugdanan sa mas konkretong mga lakang aron sulbaron ang suliran.

3.    Ang pagkapari dili lang mahitungod sa pag-ampo ug pagpanalangin. Ang pagkapari naglambigit man pud og pagkapropeta diin kinahanglang mosangyaw sa bisan unsang maayo ug matuod ug dili sa bakak ug pangilad. Dugang pa ang maalagarong pagkapari nagasukad man sa paghunahuna sa kaayohan sa iyang mga parokyano usahay gani sa iyang kaugalingong risgo. Risgo nga dili hisabtan, risgo nga bugalbugalan.

Taliabot na usab ang laing hugna sa paggambalay sa usa ka nasudnong panaw pinaagi sa sagradong akto sa atong pagbotar. Diha sa pagpili sa atong nasudnong pamunoan. Subo lamang palandungon sanglit nahimong daw haguka ang disposisyon sa kadaghanan.

Nahimong idlas ang hustong lohika ug paminsar. Nahimong dugokan sa mga mini nga impormasyon ang Facebook. Ug labaw sa tanan nahimong ang tarong nga pagpadayag sa usa ka panahom, mamahimong bugalbuglan lamang sa mga pangisip nga napunohatan sa mga sugyot gikan sa kangitngitan. Ug kun gani mobalik man ang dulom natong kagahapon, mag-unsa man kaha ang atong nasud  nga Pilipinhon? Ang Krisis mamahimong usa ka endemic sanglit nahimo man kitang miuyon sa igong kasayon aron atong tanlag mahimong molunang sa walay sukaranang taghap alang sa maayong kaugmaon. Ang maayong kaugmaon dili nato makab-ot kun karon pa lang daan mmahimo motugot lang nga banhigon.