Ania, miabot na ang tukmang adlaw sa paghukom. Adlaw, diin ultimong kinapobrehang botante nga anaa magpuyo sa gubaong payag, maoy mopili kinsang kandidatoha nga miaplay pagka Presidente, Bise Presidente ug uban pang posisyon ang tukmang dawaton.
Kini pinaagi sa pagbulit og tinta ngadto sa giimprintang lingin tupad sa walang bahin sa ngalan sa mga kandidato, kinsa sa atong pagpanghimbis maoy haom nga ibutang sa puwesto nga ilang giaplayan. Sagrado ang imong boto. Intawon ampingi, ayaw usiki!
Apan kon hilig kang mobaligya niini sama sa gikompisal-anunsiyo niadtong mipalit og barbecue sa barbekiyuhan nga akong nasum-okan, diin nanghatag kuno og tag P2K ang milansar sa pagka mayor sa ilahang siyudad, aw, dili gyod nimo masinati ang talagsaong kalipay sa kahalangdon ug kaligdong.
Kay imbes, ikaw ang giilang boss sa mga kandidato ug sila imo rang mga ulipon, nagpabayad ka man aron ikaw ilang magawngan ug mao hinuoy himoong ulipon.
Hinuon, ning panahon nga dili na ma-solo sa mainstraim media ang pagtanom og grabeng pang-impluwensiyang panibya ngadto sa katilingban pabor sa ilang gipaborang mga kandidato, ang atong sosyedad dili na daling mokubit-mailad.
Tungod sa nagbahang channel sa social media, diin mga vlogger mao pay sagad mahiuna sa paghimog balita ug contents sa mga lab-as nga panghitabo, milyonmilyong netizen ug citizen ang nahigmata na sa kamatuoran.
Kamatuoran, nga kanhi gitago sa mainstream media pero karon giladlad sa social media.
Hinungdan, bisag unsaon pa pag-ingon sa mga grupong nangugat, nga giusab kuno sa social media ang istorya sa nangaging hitabo sa atong nasod, dili na sila tuohan sa mga botante ning bag-o tang henerasiyon, kinsa kugihan kaayong nag-research-nangutingkay sa gilubong nga kamatuoran.
Ug kini ilang napalgan.
Sa tanang Presidential and Vice-presidential candidates, ang Leni-Kiko tandem ug BBM-SARA Uniteam maoy seguradong magkombati.
May Leni-Kiko supporters sigeg bandilyo nga gituis kuno sa diehard BBM-SARA Uniteam loyalists ang orihinal nga istorya sa Pilipinas, labi na ang bahin sa Martial Law. Kinsa kaha kanila ang angay dapigan?
Election Day karon. Matag supporter sa masig ka habig, makapahungaw na sa tim-os nilang gibati pinaagi sa pagbotar-pili sa gimahal nilang mga kandidato. Unta, sa kasingkasing maoy mohari ang kahapsay’g kalinaw.
Kaninyong tanan, “Happy Voters Day!”