Abril 17, 2022: Domingo sa Pasko sa pagkabanhaw
Mga Pagbasa: Buh. 10;34,37-43/Sal. 118/Col. 3;1-4/Jn. 20;1-9
Sayo sa buntag ganahan kaayo kong mobangon ug kun tugotan sa maayong panahon mosuroy sa lapyahan diin nahimutang ang akong parokya.
Nindot ang huni sa kalanggaman ug dili kabayran og salapi ang makapa relax nga tingog sa mga balod.
Kaanindot ug kabulahan ko nga nakasinati ning maong matang sa gasa sa kabuntagon.
Mao tingali kini ang hinungdan kun nganong ang atong mga katigulangan mopahimutang gyud sa mga ganghaan ug bintana sa mga dapit pabor sa sidlakan.
Kaniadto ang pari magtalikod magmisa. Gitawag kadto og Ad Orientem kun Facing the East.
Si Jesus nga nagbitay sa Krus mao man ang Adlaw nga mosubang aron modan-ag kanato.
Si Jesus nga anaa sa tabernakulo mao man ang adlaw nga mosubang aron maghatag og kainit sa tigmi natong kinabuhi.
Apan ang maong balansayon ug pamaagi sa pagsimba nahanaw sa dihang nahimugso ang mga kausaban nga gilatid sa Segundo Vaticano.
Sa kalisodbning atong kapanahonan karon gidapit kita aron mamahimong mga Easter People ug diin atong awiton ang Alelluia ingon nga atong alawiton.
Atong hinumdoman nga ang Dios dili Dios sa mga patay, hinunoa siya buhi ug buot niyang kita mismo magpuyo sa kinabuhing madagayaon. Dili lang alive but truly alive.
Happy Easter kanatong tanan! Ug bisan pa man sa bagyong Agaton nga nilubong sa atong mga kaigsuonan didto sa Leyte unta mobangon unta sa gihapon ang pagtuo nga natandog ug naunlod gumikan ning maong katalagman.
Ang mga pangandoy nga nahimong magun-ob gumikan niining maong katalagman.