Gubat sa rally

Gipaabot ang gubat sa rally tali sa kampo ni kanhi senador Bongbong Marcos ug Bise Presidente Leni Robredo dinhi sa Sugbo karong semanaha.

Ang kampo ni Marcos misaad nga ilang himoong “red sea” ang South Road Properties (SRP) ugmang adlawa atol sa ilang grand rally nga giulohan og UniTeam Cebu Festival.

Tinguha sa mga organizers sa UniTeam Cebu nga pun-on ang bakanting luna atbang sa Il Corso sa SRP dinhi sa dakbayan sa Sugbo.

Ilang traget nga moabot og kapin sa 220 mil ka mga tawo ang motambong sa rally.

Sa pikas bahin, ang mga dumadapig ni Robredo misaad nga ilang palabwan ang gidaghanon sa mga motambong sa grand rally sa UniTeam ugma atol sa ilang grand rally karong Petsa 21 didto sa dakbayan sa Mandaue.

Usa sa mga organizers sa “Ceboom” grand rally ni Robredo dinhi sa Sugbo mitug-an, ilang himoong “pink wave” ang bakanteng lote atbang sa Bai Hotel diha sa North Reclamation Area.

Atong masukod human niining duha ka grand rally kinsay llamado dinhi sa Sugbo.

Si Marcos suportado  sa mga dagkong partido ug politiko sa Sugbo—sila si Mayor Michael Rama ug Gobernador Gwen Garcia.

Apan si Robredo gipaluyohan usab Bando Osmeña Pundok Kauswagan (BOPK) dinhi sa dakbayan ug ni Bise Gobernador Junjun Davide sa probinsiya.

Atong masuta human sa mga rally kinsay llamado dinhi sa Sugbo nga naila isip anti-Marcos atol sa rehimin sa diktadorya.

Ang supporta sa mga Sugboanon dako og mamahimong epekto sa eleksiyon karong Mayo 9 sanglit ang Sugbo maoy labing daghan og rehistradong botante sa tanang lalawigan sa nasud.

Sigun sa data sa Comelec, ang Sugbo dunay rehistradong botante nga moabot og 3.288 milyones. Siya maoy nag-unang lalawigan nga dunay pinakadaghan og rehistradong botante.

Nagsunod sa Sugbo ang Cavite samtang ang ikatulo mao ang Pangasinan.

Ug sama sa gobernador sa Sugbo, ang mga gobernador sa Cavite ug Pangasinan tua pud mopaluyo ni Marcos ug sa iyang runningmate nga si Davao City Mayor Sara Duterte.