Buot unta nakong palig-onon ang akong kinabuhi sa pag-ampo apan sa matag higayon nga ako kining himoon dunay dakong posibilidad nga ako mahinanok dayon.
Buot ko untang sundon ang prayer periods nga gihimo sa mga monghe apan malisud kini nga pagahimoon. Hinuon kun hatagan lang gyud kini og igong pagtagad mamahimong matuman kini sa igong panahon.
Sa laing bahin, dunay linain nga pagsabot ug pamalandong ang pulong paghikatulog nga malinawon. Mahimong sabton kini nato nga:
1. Naandan nga paghikatulog sama sa siesta kun pahuway sa udto hangtud hapon o sa kagabhion.
2. Pagkamatay nga dili na mahimong mobangon pa.
O mahimong sabton nato kini ingon nga total nga pagpahuway ngadto sa kabubut-on sa Dios. Sa ato pa, total surrender sa tanan nga atong gihunahuna, gibati ug gipangindahay.
May basahon kita nga libro sa pag-ampo apan ang tanan mamahimong makahuloganon labina kun kini atong pasudlon mismo sulod sa atong kasingkasing. Mao kini madala kanato sa pagsulod mismo sa presensiya sa Dios.
Ning panahon sa kwaresma ug sa atong pagsulod mismo sa Semana Santa. Ang kahilom ug ang pagtugot sa tingog sa Dios mosulti sa atong kahiladman mahinungdanon man aron mamahimong mas buhi ang atong panaw padulong kinabuhing balaan.
Nahinanok man tuod ako apan Salamat sa Dios nahanaw man pud ang kakapoy ug kabug-at nga akong gihambin.