Buhis

Sentro sa diskusyon sa mga kandidato alang sa umaabot eleksiyon ang utang sa pamilyang Marcos ngadto sa gobyerno. Init ang lantugi mahitungod niini-- angayan ba nga mangusog ang gobiyerno aron pugson ang pamilya ni kanhi senador Bongbong Marcos, kandidato pagkapresidente, nga bayran ang ilang obligasyon?

Ug isip usa sa mga nagtinguha nga mahimong lider sa nasud, dili ba maayong buhaton ni Marcos ug sa iyang pamilya ang paghatag og maayong ehemplo sa katawhan pinaagi sa pagbayad sa ilang buhis?

Pipila lang ni sa mga pangutana mahitungod sa maong isyu nga wala pay tubag habgtud karon.

Sa unang pangutana, responsibilidad ug trabaho sa atong gobiyerno ang pagkolekta og buhis. Kini tungod kay ang atong buhis maoy nagsilbing kinabuhi sa gobiyerno aron mahimo niini ang iyang trabaho ug responsibilidad sa ngadto sa katawhan. Kini maoy hinungdan nga niadtong miaging tuig mipadala og demand letter ang Bureau of Internal Revenue (BIR) ngadto sa pamilyang Marcos aron paninglon sa ilang buhis nga karon mosumada na og P203.8 bilyones tungod sa interest ug penalties.

Ug sigun sa Korte Suprema final ug dili na mahimong iapelar ang tax assessment sa BIR.

Busa anaa na karon sa puder sa atong gobiyerno ang paggamit sa iyang gahom arom makolekta ang maong kantidad.

Apan kun modaog si Bongbong isip presidente siguradong mahanaw ang maong kantidad tungod kay di tang kapaabot nga paninglon niya ang iyang kaugalingon.

Sa ika duhang pangutana, obligasyon sa matag Pilipino ang pagbayad og buhis ngadto sa gobiyerno.

Usa ni sa mga sumbanan sa maayong lumulopyo ang regular nga pagbayad sa hustong buhis. Ug sagad sa mga ordinaryong magbubuhis, bisan bug-at sa kabubut-on ug bulsa, way mahimo tungod kay gikolekta na daan ang atong buhis pinaagi sa withholding tax alang sa mga empleyado og kompaniya.

Kun kitang ordinaryong trabahante nga kuwang ra gani ang sweldo sa inadlaw-adlaw nga panginahanglan relihiyosong nagtuman sa pagbayad sa atong buhis, mosugot mo nga dunay mga adunahan ug dagkong politiko nga di mobayad sa ilang buhis?

Ang labing pait nga hunahunaon mao nga kadtong wala mobayad og buhis mao pay sagad nagpahimulos sa gobiyerno.