Isip kabahin sa modernisasyon sa Carbon Public Market tinguha sa dakbayan sa Sugbo nga balhinon ang mga naninda diha sa Freedom Park ug Warrick Barracks ngadto sa gitukod nga interim market sa may dalan F. Calderon aron paghatag og agianan sa proyekto.
Ang City Market Authority pinaagi sa pangulo niini nga si Raquel Arce mimando sa mga naninda nga bakantihan ang ilang pwesto ug mobalhin na ngadto sa interim market building.
Apan inay tumanon ang kamandoan nagprotesta ang mga vendors ug midemanda nga bakwion ang notice to vacate.
Ilang gi kwestiyon ang awtoridad ni Arce sa paghimo niini. Si Arce maoy gitahasan sa kagamhanan sa dakbayan pagdumala sa kamerkadohan busa duna siyay gahom sa pagpatuman sa kamanduan gikan sa syudad.
Ang modernisasyon
sa Carbon proyekto sa dakbayan uban sa Megawide pinaagi sa joint venture agreement.
Wala koy laing rason nga makita niining pagsupak sa mga vendors sa proyekto gawas sa ilang hakog ug personal nga interest.
Dili sila mawagtangan og panginabuhian tungod kay ipahiluna sila sa mas hapsay nga dapit. Apan nganong mosupak?
Ang rason klaro ug tataw. Dili gusto ang maong mga vendors matugaw ilang pagpahimus sa pwesto sa merkado.
Ang tinuod dili lang tindahan ang maapektohan nila kun dili lakip ilang mga pinuy-anan tungod kay sagad niining maong mga manindahay anaa na sab manimuyo sa Carbon.
Dili sila gustong mobalhin sa interim market tungod kay dili naman nila kini mahimong puy-an.
Kini maoy akong nakitang dakong rason nganong taliwa sa mas hapsay nga luna nga gihatag sa gobyerno aron ilang kapanindahan nangugat gyud sila nga magpabilin sa ilang nahimutangan.
Buot nilang protehian ang interest ug katungod kunohay nga wala ihatag sa gobyerno ug sa balaod ngadto nila.
Illegal ang ilang paghimo sa merkado nga pinuy-anan. Ang Market Code hugtanong nagdili nga himoong pinuy-anan ang merkado sanglit dili kini maoy tukmang dapit nga puy-an.
Ang merkado alang sa pagpaninda ug dili mahimong gamiton nga residensiya sa mga tindira ug tindiro.