Unta malapason prisohon

Usahay, kon maoy puy-an sa tawo ang kaadunahan, makalimot siya nga adunay Ginoo, kinsa maoy tag-iya sa tanan niining kalibotana. Ug nagtuo, nga siya na maoy Ginoo.

Diin, tungod sa gahom sa salapi nga naa na kaniya, sobra siya ka masaligon, nga kutob sa bisan unsa ka mahal sa butang nga iyan g maibgan, mapalit niya tanan. Lakip nang timbangan sa balaod sa Pilipinas.

Pipila na ba ka adunahang kriminal ang nagpabiling gawasnon, samtang ang mga pobreng walay sala, walay ikasukol sa dakong gubat sa korte, mao pa hinuoy nangapriso?

Mga paring tigduawan sa prisohan ug tigpakompisal sa mga nangabilanggong inosenteng kabos, makatug-an unsa ka dili makiangayon ang atwong hukmanan, base sa mga makatandog sugid sa mga nanaghilak nga biktima.

Sakit man paminawon, apan tinuod atong madungog: “Ang balaod sa Pilipinas dili patas.” Gani, kon bilyonaryo ang ikiha, ang kasong mahimo ra untang taposon-desisyonan sa hamubong panahon, maabtan pag katuigan nga mapadayon. Hangtod sa kaulahian, ang sad-ang bilyonaryo pay padag-on.

Niining bag-o, ang Makati City Prosecutor’s Office misang-at og kasong kriminal batok kang Gwyneth Anne Chua, kinsa miikyas sa hotel, diin siya gikuwarentina pag-abot niya sa Pilipinas gikan sa Amerika sa miaging Disyembre 22, 2021.

Bisa’g wala pa mapupos ang hustong mga adlaw sa pagkuwarentina, miuli ang Poblacion girl sa ilaha ug mitambong og party sa usa ka bar nga miresulta sa pagtinakdanay og COVID-19 virus nila ni Gwyneth, kaubanang party-goers ug mga empleyado sa bar, diin gidudaghang may Omicron variant nang nakasulod sa atong nasud.

Hasta walo sa mga kadagkoan, kinsa gituohang nakalapas sa safety health protocols, gikasohan pod. Dapat lang! Kay bisag dili tuod deadly si Omicron, mas maayong di mokompiyansa.

Busa, ingkaso’g human sa imbestigasyon o due process mamatud-ang sad-an sila, unta walay impluwensiyadong gahom nga makabawog sa usahay malugak tang balaod. Unta, dili ang gisul-ob bulawan sa gipangkiha maoy basehawn sa paghukom. Kondili, ang unsay salaod nga ilang nahimo.

Ug bisan kadugo man ang hukman sa maghuhukom, unta ipakanaog ang tukma-patas ug makatarunganong desisyon. Kon sila hukmang mapriso, dapat, prisohon gayod. Kay niini lang paagihang mapruyba, nga dili diay makapalit sa salapi ni malugak sa mga kadugo ang balaod sa Pilipinas.