EDITORYAL - Pagsaludo kang Labella

Makapabuhi og kasingkasing ang kadaghan sa mga tawong nagpaabot sa kilid sa kadalanan aron paghatag og pagtahod ug pagsaludo kang anhing Cebu City Mayor Edgardo Labella sa pagbiyahe sa iyang funeral procession kagahapong adlawa.

Gikan sa Crystal Palace sa Barangay Lahug hangtud sa Cebu City Hall daghang mga tawo, kadaghanan nangsuot og put inga t-shirts ang nagpaabot sa paglabay sa iyang purlon.

Diha usab ang nagkadaiyang fire volunteer brigades gikan sa nagkadaiyang mga barangay, kaalyado man o dili sa mayor ang ilang mga kapitan, aron pagtahod pagsaludo pinaagi sa water salute.

Samtang tuod daghan ang mibiaybiay sa mayor sa buhi pa kini ug sa pamaagi sa iyang pagdumala, wala siyay dayag nga kontraug labaw sa tanan dili madinumtanong lider.

Tungod kay makamao siyang modala bisan sa mga tawong dili ganahan kaniya.Talagsaon ra kini nga hiyas.

Dili siya perpekto apan bisan pa niini daghan gihapon siya og nahimo isip mayor sa siyudad, kini bisan pa og dunay pandemiya nga nihamok sa siyudad.

Gipaabot nga sugod kagabii hangtud karong adlawa magpunsisok ang mga tawong molili sa haya sa mayor diha sa City Hall aron bisan sa kataposang higayon makita nila kini.

Makapalipay sab sa mga tawo ang pamahayag sa bag-ong mayor nga si Michael Rama nga ipadayon niini ang tanang nasugdan ni Labella para sa katawhan.

Dili na bag-o kang Rama ang pagdumala sa siyudad tungod kay kaniadto siya man ang mayor sa dakbayan kaniadto.

Dako karong hagit kang Rama ang pagbangon sa siyudad gikan sa pandemiya, ang nakaayo niini sa sitwasyon karon duna nay kagawasan si Rama paghimo og desisyon para sa ikaayo sa siyudad.