Kon ang kontes sa sayaw o kanta may show time ang matag partisipante nga mopakita sa ilang tinagoang abilidad, sa politika ang mga magpiling politiko aduna poy iya-iyang showtime. Dunay kandidatong sayonsayon lang ang pagsaad: nga ingkasog siya maoy modaog, hatagan gyod niyag balay ang tanang kabos.
Usab, naay mipasiatab nga siya limpiyo nga kandidato. Bisan gamay, wala maduhig iyang pangalan sa bisan unsang matang nga anomaliya. Ug usab, anaay sigeg ukay sa baho sa iyang kontra.
Ang pait, kay may kandidatong sobra kataas ang pagtan-aw sa iyang kaugalingon. Bisan wala pa gani ma-presidente sa Pilipinas, giyatakan na niya ang trabaho sa presidente. Imbes mananghid pag-una sa unsay nahunahunaang iimplementar, mideretso hinuon sa pagpatuman niini ngadto sa katawhan. Hain na ba ang dalaygong ‘always pay respect to your superior’ nga kinaiya? Tungod ba sa sobrang kataas sa ambisiyon, kalit lang kining nawala?
Dihang mipagawas og Executive Order No. 42 (kamandoan) si Manila Mayor Isko Moreno nga mahimo nang ipatangtang ang pagsul-ob og face shields sa Manila, nainat ang kilay ni presidential spokesperson Harry Roque, kinsa mianunsiyo-pasabot nga ang gihimo ni Isko, usa ka dakong pagyatak sa katungod ni Pres. Rodrigo Duterte. Busa, gikonsiderar nga null and void.
Angay hinumdoman. Nga giumol ni Duterte ang Inter-Agency Task Force (IATF) ug gitugyanag gahom nga maoy mangulo sa pagpakig-away batok sa makalilisang pandemiya nga giatubang sa atong nasod karon. Kon unsay health protocol nga ilang ipasunod, dapat tumanon. Pero kon, ang usa ka LGU may gustong usbon, mananghid-hangyo una sa IATF. Diin, kon mauyonan man kini o dili, ang maong hangyo ilang dad-on ngadto sa lamesa ni Duterte aron paabrobahan.
Pastilan, unsa kahay bation ni Isko, kon siya pay anaa sa sapatos ni Duterte? Diin, imbes moagi sa hustong proseso ang maong balaod, iya man hinuong gi-short cut? Dili ba matawag man kining insubordination?
Sa bagay, molansar pagka-presidente si Isko sunod tuig nga eleksiyon. Gusto siyang magpahumot sa katawhan. Hinungdan, nga bisag giobserbaran-planohan na sa Malakanyag ang non-wearing of face shields, iya kining giunhan.
Ngano? It’s show time! Ug mga botante ra gyu’y makahukom, kon unsay ilang igrado sa gihimo ni Yorme: Thumbs up ba, o thumbs down?