Daw nagpalabwanay karon ang China ug ang Amerika nga maka-suplay og Covid-19 vaccines dinhi sa Pilipinas ug sa ubang mga silingang nasud niini sa Southeast Asia(SEA).
Una niini, naiwit ang Amerika ug ubang mga nasud sa Uropa pag-suplay og bakuna sa mga nasud sa SEA kay gisiguro nila ang ilang mga tawo aron mabakunahan.
Kining maong mga bakuna mao ang Pfizer-BioNtech, Moderna, Jansen ug uban pa gikan sa US ug sa UK.
Sa wala pa kining maong mga bakunaha sa Asya, nag-una na ang mga Chinese-made Covid-19 vaccines nga gipanggamit bisan dunay pagduhaduha sa kaepektibo niini.
Apan tungod kay nameligro man gyud ang mga populasyon gidawat kini sa mga nasud, sama sa Pilipinas.
Ang World Health Organization mipasiugda og global cooperation on vaccine research aron pagpangita og solusyon batok sa hulga.
Kini sama sa COVAX nga kung diin nagtampo-tampo ang mga nasud nga dunay kapabilidad pagdiskubre og bakuna nga magamit batok Covid-19.
Pinaagi sa gahum ug impluwensiya sa WHO, mayoriya sa mga nasud ang nitugot nga testingan kining mga bakuna sa ilang mga populasyon.
Samtang tuod nag-una ang mga first world countries sama sa Uropa ug Amerika sa pagpamakuna, duna pa gihapoy mga nasud nga wala pa gyud hingpit nakaabot bisan katunga sa ilang populasyon ang nabakunahan.
Usa niini ang Pilipinas nga sa sinugdanan nahimong recipient sa mga Chinese –made vaccines sama sa Sinovac ug Sinopharm.
Milyones ka doses ang gidonar sa China dinhi sa Pilipinas, salamat sa pakigsuod sa administrasyong Duterte ngadto sa ilang nasud. Karong naghinapos nga tuig, nibawi sab ang US ug ang Uropa pagsuplay og bakuna dinhi.
Tungod sa mga bakuna, hinayhinay ng gitangtang sa mga gobiyerno ang mga restriksyon sama sa mga lockdowns isip pangontra sa pagkatap sa virus.
Apan hangtud dili hingpit mabakunahan ang mayoriya sa populasyon sa kalibotan ug kun dunay mga nasud nga mabiyaan, magpabiling hulga para sa tanan kining maong virus nga padayon sab nagkabangis ang strain.
Matud pa sa panultihon “we are only as strong as the weakest link.” Nagpasabot kini nga tanang hilo sa pisi, kinahanglang lig-on, kun dunay usa nga may guna makapahuyang kini sa kinatibuk-an.