Kun sa pagsugod pa lang daan

Wala lang gyud unta pakagamya ang Corona nahimong hapsay na unta ang tanan karong mga panahona. Apan ang walay unod nga pakigpulong, inubanan sa walay bukog nga pasalig maoy hinungdan kun nganong ania, nahimong daw tamparos ang tanan sa atong apapangig. Ang resulta, kitang tanan nagkuyaig! Samtang ang kinabag-an pabiling napaig sa hudno sa malimbongong pipila mao nga asa kaha kutob ang atong panlimbasog?

Nahimong epektibo pa ba ang pag-ampo? Ang prusisyon ug uban pang ritwal sa pangilaba? Ug kun ugaling halayo pa sa gihapon ang maong pangindahay nga kaayohan? Nagpasabot ba kini og pag-awop sa pagtuo nga gihuptan? Nigawas pa nuon nga ang Pharmally maoy nabiktima sa mga mapahimuslanong kaliwatan ni Juan dela Cruz.

Sa pagsugod pa lang daan nahimo untang prayoridad ang seguridad kun gitakpan ang mga agianan sa pagsugod pa lang daan. Apan ang nahitabo mao nga daghan na ang gipasulod aron sa atong kadalanan maglatagaw. Mao nga nia, nag-antos kita sa maong kagaw, pun-an pa sa panglawgaw mao nga ang resulta usa ka dakong kutaw!

Tinuod kalibotanon kining maong suliran, apan wala kini magpasabot nga kay kalibutanon man dili na lang gyud nato palig-onon ang atong kaugalingon. Matag dapit dunay kaugalingong konteksto ug matag kultura dunay kaugalingong pamaagi. Dili kay himoong kuridas ang tanan.

Tanan dunay panginahanglan. Matag usa kanato dunay giampo ug gipangindahay. Apan subo palandungon nga sa atong pagka-focus sa atong kaugalingong suliran nahikalimot kita sa suliran sa uban. Nahikalimot kita nga dunay uban nga mas nagkinahanglan pa kay kanato. O tungod sa kahakog sa gahum buot natong dominahon ang kadaghanan kanato aron mogawas kita nga mga bayan inga nahimong mga diktador.

Ang tanan magasugod gyud sa sinugdanan. Kun sayop ang Sistema sa sinugdanan ayaw pagpaabot nga mamahimong hapsay ang gipaabot natong katapusan.