Ang mga bayani sa mga hayop

Palayo sa ta’g hisgot sa COVID-19. Diri sa ta sa mga maayong balita sama sa bayanihong lakang nga gihimo sa mga tawo nga nagpakabana sa kinabuhi dili lang sa isig ka tawo kon dili na sa mga hayop.

Sama nalang sa gihimo sa mga sakop sa desaster frontliners sa dakbayan sa mga LGU nga miluwas sa mga iring, unahon nato og hisgot ang gihimo sa mga rescuers sa Cebu City Disaster Risk Reduction and Management Office CCDRRMO.

Giluwas nila ang iring nga na-trap sa ikawalong andana sa usa ka condominium sa North Reclamation Area sa dakbayan sa Sugbo.

Alang sa uban ang mga hayop daw wala hatagi og bili nga gani ligsan lang apan ang gihimo sa mga tawo nga nagpakabana sa kinabuhi sa mga hayop usa ka dalaygon kay gibutang nila ang ilang kinabuhi sa peligro tungod ug alang sa kinabuhi sa hayop.

Seguro moingon ang uban nga mabaw ra man ning estorya kay naglibot lang sa iring. Apan dako kini’g impact sa mga mahigugmaon sa kinabuhi nga aduna pa diay mga tawo nga nagpakabana sa tanang mga nilalang nga nagkinahanglan sa panabang.

Balikan nato ang iring nga na trap. Duna diay plano ang ubang tenant nga ituklod nalang ang iring aron mahagbong kay sabaan na kaayo sila nga dunay magsige og ngiyaw matag gabii.

Maayo nalang kay naay nakahunahuna nga mitawag sa DVMF aron mapangitaan og pamaagi nga mahaw-as ang iring gikan sa building. Dili sayon kay taas kaayo ang building ug kong masipyat ang tawo nga mo-rescue aw segurado gyud nga siya sa menteryo moderetso.

Kay dili baya siya sama sa iring nga adunay siyam ka kinabuhi matud sa uban.

Sa sinugdanan nakapanguta ko nganong ma-trap man ang iring nga maayo man kining mokatkat sa kaso o sa mga balay nga nakaabot gani siya sa 8th floor.

Pasabot ni Dr. Jessica Maribojoc, in charge sa DVMF, nga maayo lang diay mokatkat ang iring apan dili na makamao nga mokanaug nga maoy nahitabo, sama sa panghitabo usab sa Mandaue City nga ang iring na trap sa atop sa usa ka balay nga gi-rescue sa mga sakop sa BFP.

Alang sa mga tawo nga sayop ra kaayo mamatid og hayop ilabi na sa mga iring, unta panaminan nila ang gihimo sa mga rescuers nga bayani sa mga hayop.

Ang mga sugilanon nga sama niini ang angayan usab natong ipakaylap kay maghatag kini og inspirasyon ug pagtulon-an kay sa magsige nalang kita og hisgot sa estorya sa COVID-19 nga walay kahumanan.