Asa na mo?

Dili higdaanan ang nagkulang sa mga tambalanan dinhi sa dakbayan sa Sugbo kondili ang mga medical personnel nga makaatiman sa mga pasyente. Mao ni ang gitugan ni Cebu City Acting Mayor Mike Rama.

Ang Cebu City adunay 15 ka mga tambalanan diin 11 ang pribado ug upat ang iya sa lokal ug nasudnong kagamhanan. Sa 1,023 ka mga higdaanan sa 15 ka mga tambalanan, 580 pa lamang ang adunay naghigda o nagamit o aduna lamang 56.7 porsiyento nga occupancy rate ang tambalanan ssa dakbayan sa Sugbo.

Tungod sa kakuwang sa mga nurse, ang dakbayan sa Sugbo manawat og 200 ka mga nurse diin ang 100 idistino sa mga quarantine facilities ug sa Cebu City Medical Center samtang ang laing usa100 idistino sa mga pribadong tambalanan.

Sa pagkakaron wala pa kita masayod kon pila na ang nadawat nga nurse sa dakbayan sa Sugbo.

Ang Departamento sa Panglawas sa rehiyon 7 manawat usab og 50 ka nurse apan walo pa lamang ang ilang nadawat. Hinuon nakadistino na ang DOH-7 og 70 ka mga nurses sa tibuok isla sa Sugbo matud pa ni Dr. Jaime Bernadas ang director sa nahisgotang ahensiya.

Tungod way nurses nga nagpakabana sa pag-apply mihangyo si Dr. Bernadas sa mga bagong nakapasar sa Nursing Board Examination nga himuon na nila ang ilang tahas tungod sa nagpadayong hulga sa pandemiya.

Dili na kita matingala nga bisan nagbaha ang nurses nga walay trabaho wala sila magbaha pag-adto sa City Hall sa dakbayan sa Sugbo aron mo-apply. Pasmohon man god ka sa City Hall una ka makadawat sa imong suweldo.

Reklamo sa mga nurse nga nagtrabaho sa mga tambalanan nga gipadagan sa dakbayan sa Sugbo, moabot una og pila ka buwan una pa sila makadawat sa ilang suweldo ug ang benepisyo nga ilang madawat kana ra g’yong tawgon sila nga bayani sa bagong panahon.