Puno apan daghang bakanti

Wa molurang ang pagsaka sa gidaghanon sa mga nataptan sa COVID dinhi sa Sugbo labi pa sa dakbayan.

Ang mga opisyal sa dakbayan sa Sugbo nagpatabang na sa nasudnong kagamhanan tungod kay dili na maakos sa mga tambalanan pag-atiman ang mga pasyente.

Gawas sa kapuno na sa mga tambalanan, matud ni Konsehal Dave Tumulak nagkuwang na sab ang mga tambal ug PPE ug labaw sa tanan ang dakong kakuwangan sa mga medical personnel.

Apan kun ang DOH ang pangutan-on di tinuod nga puno ang mga tambalanan.

Gani ang kun imong tan-awon ang mga datus gikan sa DOH way tambalanan sa Sugbo nga niabot og 100 percent ang accupancy rate.

Dinhi mitumaw ang kalibog sa publiko unsa man gyuy tinuod nga kahimtang sa atong mga tambalanan?

Kun dili pa puno ang mga tambalanan, nganong naglinya ang mga pasyente gawas sa usa ka pribadong tambalanan sa dakbayan nga nagtangkil og tangke sa oxygen samtang naghuwat kanus-a sila madawat?

Ang tubag mao ni: Tinuod daghan pa ang mga kwarto ug higdaanan nga available sa mga tambalanan apan puno na sila tungod kay dili mahimong gamiton sa tambalanan ang ilang mga bakanteng kwarto ug higdanan hangtud nga wala silay mga nurses ug doktor nga makaatiman sa mga pasyente.

Sa laktod dili kwarto ug higdaanan ang nagkuwang nato tungod kay daghan pa ang bakanti sa atong mga hospital.

Ang dako ug seryosong kakuwangan nga atong giatubang karon sa padayong kumbati batok sa pandemiya mao ang pagkuwang sa mga health professionals.

Gani nagpunay na og panawag ang DOH sa mga nurses ug mga doktor nga moapply apan nihit ang misanong tungod kay sagad nangahadlok.

Gawas niini dunay problema ang atong gobiyerno sa pagpanuweldo. Daghan sa mga nurses gikan sa CCMC ang nang-resign kay wa sweldohi sulod sa upat ka buwan. Ang uban nilangyaw tungod kay mas dako og sweldo didto sa gawas sa nasud.

Way kapuslanan ang mga bakanti nga kwarto ug higdaanan sa mga tambalanan kun way nurses ug doktor. Mao ni hinungdan nga bisan daghang bakanti apan puno na ang atong mga tambalanan.

Ang atong kasinatian karon angayang magsilbing leksiyon sa kagamhanan nga atimanon ug tutokan ang paghatag og maayong benepisyo sa atong mga health professionals.

Wa ni kalainan niadto sa panahon nga way ganahan manarbaho sa gobyerno tungod sa kagamay sa sweldo itandi sa pribadong sektor.

Apan human ipatuman ang salary standardization sa mga kawani sa gobyerno daghan na ang naingganyo nga manarbaho sa gobyerno.

Tingali mapatuman ang susamang pamaagi aron pagdasig sa mga health professionals nga magpabilin dinhi sa atong nasud inay nga molangyaw.