Kamatuoran luyo sa hulagway

Ang kahadlok sa Delta variant gisamotan sa mga migawas nga talan-awon sa social media mahitungod sa sitwasyon sa mga tambalanan sa mga dapit sa Sugbo ilabi na sa Cebu City.

Gipakita ang mga pribadong sakyanan nga naglinya nga adunay sakay nga mga pasyente nga gipang -oxygen ug anaa usay mga naghigda sa gawas sa mga tambalanan. Samtang niadtong nakalabay’ng adlaw nagdasok usab ang mga tawo nga namalit ug nagpa-refill ug oxygen diha sa may dalan B. Rodriguez nga kong dili gyud sayron ang estoya murag makaingon ang uban nga nagpanic ang mga tawo.

Akong tagsatagsaon ang sitwasyon kay para nako naghatag kini og dakong kahadlok sa mga tawo nga ingon na ba gyud ka grabe ang sitwasyon sa COVID-19 sa atong lugar sa Sugbo.

Sa sitwasyon sa pribadong hospitan sa syudad, nag-abot ang mga pasyente nga wala dayon ma-admit kay kuwang ang personnel sa tambalanan. Gawas pa nagpaabot sila sa resulta sa swab test kay rekisito man kini ayha ma-admit sa tambalanan aron malahi ngadto sa COVID-19 ward kong mag-positive ug kong mag-negative maadto sa COVID-19 ward.

Pagkaugma naresolbar na sa hospital ang sitwasyon nga nahibalik na sa normal. Hinoon naay pipila ka mga amabulansya nga maghuwat kay lagi kuwang ang mga moatiman nga hospital staff.

Klarohon pud nato nga ang mga pasyente nga gidala sa tambalanan dili pa kompirmadong COVID-19 ang sakit kay anaa may mga gihambin nga laing balatian. Seguro ang common denominator nila ang paglisod og ginhawa maong gidudahan nga basin covid na ang nakaigo sa pasyente.

Samtang sa sitwasyon sa oxygen supply, ako mismo ang unang nang-interview sa mga tawo nga naghuwat ug sa management sa tindahan. Ang mga nagtapok didto pulos na naay naka-reserve nga supply diin segurado nga makapalit o makapa-refill na gyud.

Nahitabo lang nga dugay nakaabot ang delivery sa mga tangke gikan sa refilling station maong nagtipon-og ang mga customer sa naasoy’ng tindahan. Akong gibalikan kagahapon dili naman ingon niadto ka makalilisang nga talan-awon.

Gipasalig sa supplier nga daghan ang supply nga mahatag nila sa mga kliyente tungod kay naa man daw kakuhaan nila og oxygen. Sa laktod nga pagkasulti walay nahitabo nga panic buying sa oxygen tungod sa COVID-19.

Kasagaran sa mga namalit dad-on sa ilang mga balay diin didto ang mga nagmasakiton nga miyembro sa pamilya nga nagpaalim inay sa mga tambalanan kay lisod ug delikado man sad sa infection ang hospital.

Mahinungdanon nga tan-awon ug sabton ang sitwasyon aron dili makadugang og kabalaka sa mga tawo, inig abot na sa ubang dapit moingon sila didto nga morag little India ang Sugbo. Dili ta malipay siyempre ilabi na kon himoong rason sa gobiyerno nga ilansang kita sa estriktong protocol.

Angayan nga magtinabangay ang tanan dili sa pagpanghadlok kondili sa paghupay sa kabalaka sa kadaghanan nga dugay nang na-depress, pun-an pa gyud sa mga talan-awon nga bati.

Tinuod dako ang pagsaka sa kaso sa atong dapit. Apan kong pagtinabangay lang subli natong makab-ot ang kalamposan sa pagpakigbatok sa COVID.  Dili man mahurot apan dili usab makamugna og kaalautan ang virus ngadto sa katawhan.

Dili lang kaayo maalarma sa makita sa hulagway kay layo pa kita sa India, kong dili magmatngon posible pero molihok na ang tanan aron dili matinood ang gikahadlokan.