Angay’ng maminaw ang Inter-Agency Task Force (IATF) sa tambag sa ilang kaugalingong mga eksperto: Tungod sa pagsugod na sa local transmission ug sa limitasyon sa Philippine Genome Center (PGC), isipon na ang tanang bag-ong kaso sa Covid-19 nga Delta variant.
Sa ato pa, di na ta magpaabot nga moapas ang gidaghanon sa mga kaso sa India, Indonesia ug kasilinganang mga nasud una magkara-kara. Kinahanglan nga ipatuman na ang labing higpit nga mga lagda aron paglikay sa mas dakong kadaot kon moawas na sang mga ospital ug mohagsa na sang ekonomiya.
* * *
Nag-una sa ilang mga rekomendasyon ang pagpatuman og uniporme nga mga lagda sa pagdawat sa mga pasahero sa incoming international flights sa mga tugpahanan ug mga tripulante sa langyaw nga mga barko nga modunggo sa atong mga pantalan.
Wa silay ginganlan pero klaro nga gipasabot ang mga politiko nga nagbuutbuot pagpagawas sa Returning Overseas Filipinos (ROFs) ug Overseas Filipino Workers (OFWs) gikan sa isolation facilities human sa tulo ka adlaw, sukwahi sa lagda sa IATF nga 10 ka adlaw ug sa gitakda sa ubang kanasuran nga 21 ka adlaw.
* * *
Girekomendar sab sa mga eksperto sa IATF nga tinud-on ang pagsusi sa local government units (LGUs) sa ROFs ug OFWs sa ilang mga lugar gikang nakagawas sa isolation centers: Aron mahibaw-an dayon kon may mga timaan sa sakit, matambalan sa di mograbe ang kahimtang ug mabuwag sa di pa makatakod sa mas daghan.
Gidasonan nila ang pagkumpisal sa Department of Health (DOH) nga di 100% nga sakto ang PCR tests ug may mga gipagawas sa isolation centers bisan makatakod pa.
* * *
Wa maapil sa mga rekomendasyon, tungod tingali sa kaikog sa IATF, ang dugang swab testing. Kay langay man ang genome sequencing sa PGC pag-ila sa Delta variant, ang mas lapad nga testing maoy makatultol hain ang tinakdanay aron mabadlong sa di pa hingpit nga makakatap.
Niadto pang Marso 30 ning tuiga nga nipasalig si testing czar Vince Dizon og 90,000 ka tests kada adlaw. Pero sa akong pagsuwat ini, nitaho ang DOH nga kapin ra sa 45,000 ka tests ang nahimo. Ug sama sa naandan way nagtagad pagpasabot nganong wa matuman ang saad.
* * *