Bike lanes nakadugang sa kahuot

Sa dalan V. Rama, ang University of San Carlos, South Campus, Cebu City, naapektohan sab sa bike lanes nga gipangmontar sa karsada. Igo rang gibinla’g espasyo sa gipabarog nga red flex posts ang exit gate para sa manggawas nga sakyanan.

Ang behikulong pribado o de pasahero, dili na makadip-ig sa sidewalk kon may pasaherong manaug o mosakay.

Anha na manghunong tupad sa gialing red flex posts nga miangkog dakong luna sa karsada. Diin, mag-ugtas ang magsunod kay matagbaw intawog likay aron dili makadumbol sa gisundan.

Sa pagsulat niini, masinati na sa mga biyahedor ang kahuot sa trapiko dinhi sa atong dakbayan.

Samot, kay gipabalik nag biyahe ang mga tradisiyonal PUJ ug nagkadaghan na ang mga modernong diyep nga nagdagan.

Pero ang dalan, imbes palapdan, gipagamay hinuog samot niining mga bike lanes ug mga ali nga wala na unta kinahanglana kon gipasagdan pa lang kadtong naandan tang praktis, diin puwede ra gyong magbisikleta daplin sa dalan ang tigbisikleta.

Maayo man ang pagtukod og bike lanes. Kana kon may kaugalingong espasyo nga giandam.

Apan kon anha kini tukora sa kadalanang hagbay rang naproblema sa trapiko gumikan sa kadaginoton sa gidak-on, sama ra nga gituok nato ang kaugalingon tang liog. Sama rang mipalit-inom tag hilo aron tiwasan ang maong suliran.

Sa laktod, usa ka dakong sayop ang pagtukod og bike lanes nga wala sa hustong lugar. Minilyon ka pesos baya ang gigahin sa gobiyerno niining proyektoha.

Anugon kaayo. Gipangguba-dasmagan lang ang red flex posts sa mga badlongon, daghang magbisiklita ang di moagi dinhi, nakapagamay kinig samot sa karsada, delikado sa disgrasiya ug nakamugnag lainlaing suliran sa dughan.

Wala makasulbad ang bike lanes sa giyangongo nga panginahanglan. Nakahatag hinuog dugang suliran sa inadlaw’ng pagbiyahe sa dakbayan.

Kon niining panahona, mabatyagan nato nga mihinayhinay na’g balik ang kahuot sa trapiko, unsa na kaha kon mag-face to face classes na ang tanang eskuylahan?

Kon palawman sa pag-analisar, ang bike lanes nahisama sa dakong problema nga gipalit sa atong gobiyerno aron maoy ipaantos natong katawhan, kinsa maoy tag-iya sa gigasto sa maong walay pulos nga proyekto.

Unta, hunongon na kini to minimize the damage. Intawon, ayaw usik-usiki among kuwarta!