_banat
^

Rottweiler gidepensahan, biktima giabagan

JAV BANATI - Javier Yntig Tapulado (Banat) - June 21, 2021 - 12:00am

Usa ka Jeny Rose Gomilao, 16 –anyos, nanginhas sa baybayon sa Barangay Looc, Oslob, Cebu niadtong Hunyo 8 gipulipulihag ataki-pahit sa duha ka bagsik Rottweiler nga iro.

Daghag samad. P4,000 ray gihatag sa tag-iya sa mga nakasalang iro, base sa mga tambal nga gi-prescribe sa doktor. Pamilya sa biktima mipadayag. Kulang ra kuno kaayo ang maong kantidad, sanglit gusto sila nga ipaospital ang biktima tungod sa kadaghag samad niini.

Ang habig sa tag-iya mipahayag nga ilang mga iro adunay tangkal. Gipagawas lang nila adtong tungora aron pakalibangon. Usab, ilang balay adunay paril.

Sa wala pa ang hitabo, nadunggan sa tag-iya ang saba kaayong mga bata nga nanginhas. Busa, nakuyawan ang mga iro. Ug mideretsog layat gawas sa ilang paril. Pero sumala pa sa kapolisang miimbestigar, mubo ra ang naibabaw’ng bahin sa paril kay ang desinyo pang-sea wall lamang.

Sa tuno sa pagpamahayag, milutaw nga daw gusto pang depensahan sa tag-iya ang ilang mga binuhi, diin mora pag gipunting ang kabanha sa mga bata nga maoy hinungdang giatake si Jeny Rose sa mga iro. Apan dili kini makapalikay sa unsay ilang obligasiyon ingkasog simbako, adunay daotang mahitabo sa dalagita.

Gani, sa pagsulat niini, puro kasakit-kangulngol ang gibati tibuok kalawasan sa biktima. Unya ulo ray mairog ug dili pa gyod makatulog. Unsaon, inig piyong, maoy iyang makita ang makalilisang hitabo. Sa laktod, na-trauma ang pobreng manginginhas.

Dinhi atong makita ang kahimtang sa adunahan ug kabos. Sa gipakitang kahimsog ug kakusgan sa mga iro, klaro kaayo nga mga mahalong pagkaon ang kanunay’ng ilawog niini sa datong tag-iya. Samtang ang pobreng silingan, mangubkob pa intawon og kinhason sa hunasan aron adunay makaon.

Resulta, wala gyoy bawot ang tawong kinhason ray gikaon batok sa mananap nga karne maoy kinaon.  Labi na’g dili makakaog katulo sa usa ka adlaw.

Sa mata sa balaod, kon ang iro pasipad-an sa tawo, ang tawo may tulubagon. Unsa na kaha, kon ang tawong walay sala, maoy atakihon-kuniskunison sa mga binuhing fighting Rottweiler nga iro?

Hinuon, matud pa sa usa ka kasaligang tinubdan, ang pamilya nga tag-iya sa mga iro andam moabaga sa tanang galastohan alang sa pagpatambal-paospital sa biktima. Aw, case solved!

DOG
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with