Gibusalan

Sa mosunod nga mga adlaw posibling nihit na ang mga kasayoran gikan sa Department of Health (DOH-7) human gidid-an ang tigpamaba niini nga si Dr. Mary Jean Loreche pagtingog ug pagtubag sa mga pangutana gikan sa media.

Wala direktang angkona ni Loreche nga dunay gag order batok niya, apan ang iyang pagdumili na pagtubag sa mga pangutana sa media ug pagduso nila ngadto ni regional director Jaime Bernadas usa ray buot ipasabot—gibusalan na ang iyang baba.

Nahitabo ni human si Loreche midepensa sa protocol sa Sugbo alang sa mga manguli nga mga Filipino gikan sa gawas sa nasud lakip na sa mga overseas worker.

Atol sa hearing sa Kongreso gipasabot ni Loreche nga way kalapasan sa lagda sa IATF ang protocol nga gipatuman sa Sugbo sukwahi sa baruganan ni DOH Secretary Francisco Duque.

Inay maminaw sa iyang mga sakop nga maoy mas labaw’ng nasayod sa sitwasyon dinhi sa Sugbo, gipatigbabaw nahinuon ang ilang gahom ug pagkaarogante. Lisod tuohan nga ang interes sa katawhan maoy ilang gipatigbabaw niining pagpamugos nga sundon gyud ang lagda sa IATF ug ipadaplin ang kaugalingong protocol sa Sugbo.

Supak kaayo ang IATF sa swab-upon-arrival policy sa probinsiya kay kuno wala ni mosunod sa ilang lagda.

Pero kun imong tan-awon dili ni maoy unang higayon nga dunay innovation nga gipatuman ang Sugbo sa mga lagda sa IATF.

Pananglitan, ang lagda sa IATF mao nga kadto lang dunay simtomas nga first generation contact sa mga nagpositibo sa COVID-19 maoy ipaubos og swab test.

Buot ipasabot nga bisan pa og nahimo ka nga close contact sa COVID patient apan wala kay simtomas dili ka i-swab og mahimo ra kang magsuroy-suroy nga wa kay kalibotan og duna ka bay virus.

Apan ang lagda sa Sugbo, tanang first generation contact kinahanglan gyud ipaubos sa swab test.

Laing lagda sa IATF nagtugot sa hone isolation sa usa ka tawo nga positibo sa COVID bisan wala gani himoon nga regular nga pagbisita sa mga doktor.

Apan dinhi sa Sugbo, kinahanglan gyud nga dad-on sa isolation facility. Kadtong dili gusto sa government facility, mamahimo silang adto sa accredited nga mga hotel apan sila maoy mobayad.

Apan nganong way reklamo ang IATF niini? Nganong sa lagda alang sa mga OFWs ug ROFs labihan nilang nakapangugat?

Unsa bay ebidensiya sa IATF nga ang hinungdan sa tinakdanay mao ang nangabot nga mga overseas Filipino?

Ang pagtugot sa mga mangabot nga OFWs ug ROFs nga makauli dayon sa ilang panimay ug adto ipadayon ang quarantine way kalainan sa ilang lagda nga nagtugot sa mga klaro gyud gani nga positive sa COVID nga mag-isolate sulod sa ilang panimay.