Usa nako ka higalang magsisibya sa radyo, mipadala kanako og hulagway nga nagkauban sila si Sara Duterte, Bongbong Marcos ug Senador Imee Marcos.
Bisan og wa siya’y gisulti, apan klaro kaayong gusto niyang ipasabot nga managhigala ug suod sila si Bongbong ug Sara.
Dugay na kita nga nakadungog nga si Sara giawhag sa iyang mga supporters nga padaganon pagka presidente puli sa iyang papa nga si Presidente Duterte.
Duna sa’y mga dungog-dungog nga si Bongbong, gitan-aw nga magpapili apan wa lang masayri kon pagka presidente ba, o kaha bise presidente.
Pero kon ako maoy inyong pangutan-on, dako gyud ang akong pagtuo nga si Sara molansar gyud pagka presidente, ug di mahitabo nga magbise siyang Bongbong.
Gani, may gamay ko nga katahap nga si Presidente Duterte maoy modagan pagka mayor sa Davao, kay sigurado man ang iyang kadaogan.
Mora’g wa pa’y makapilde karon ni Duterte kon pagka mayor sa Davao ang iyang daganan. Alang sa mga wa kaayo masayod sa balaod, usa ra ka termino ang gitugot sa presidente ug si Duterte dili na makapapili pag-usab.
Buyno, kon si Senador Manny Pacquiao modayon man gyud sa pagdagan pagka presidente, lig-on usab siya nga kontra ni Sara, apan sigurado ko nga daghan pa nga iladong tawo nga magpapili.
Hinuon, si Vice President Leni Robredo mora’g gitan-aw nga wa’y ambisyon nga modagan sa pagka presidente sa nasud. Pagkakaron, si Sara ug Pacquiao pa gyud ang lig-on nga magpapili sa pagka presidente.
Nagkaduol na ang petsa alang sa pagsang-at sa Certificates of Candidacy karong Nobiyembre 1 ngadto sa 8, ug mora’g wa may emik sila si Grace Po ug ang uban nga kaniadto nanagan.
Huwaton lang nato kay sigurado ko nga kulbahinam kaayo ang kumbati sa politika karong sunod tuig.
* * *
Dinhi sa Dakbayan sa Sugbo, daghang ang nagtuo nga mag-atbang pagbalik sila si Mayor Edgar Labella ug ang kanhi mayor nga si Tomas Osmeña.
Si Tommy kanunay’ng makita nga magsuroy-suroy sa kabarangayan, ug tingali gusto niyang sutaon kon pinangga pa ba siya sa katawhan.
Ako nagtuo nga si Kongresista Bebot Abellanosa mao gyud ang pagpares, ug si Bebot maoy bise. Kon molansar si Tommy dili man gyud na mag-bise mayor.
Unya, pagka kongresista sa north district, dako ang akong pagtuo nga si Konsehal Franklin Ong maoy modagan sa kampo sa BOPK diha sa north district, ambot sa south, kinsa kaha.
Si Konsehal Niña Mabatid mitug-an nako nga molansar siya pagka kongresista, unya nakadungog sab ko nga may plano sab si Konsehal Raymond Garcia nga mag-kongresista sa north.
Ka alegre!