Asawa ug tigbakay

Ipadayon sa kapolisan sa lalawigan sa Sugbo ang kampanya batok sa tigbakay. Niadtong Domingo, dili mominus sa 45 ka sugarol ang nadakpan sa kapolisan sa managlahing lugar sa lalawigan sa Sugbo. Labing daghan sa nadakpan gikan sa Liloan nga moabot sa 25 ka sugarol ug gisundan sa lungsod sa Pinamungajan ug dakbayan sa Talisay.

Si Police Colonel Engelbert Soriano, ang hepe sa kapolisan sa lalawigan sa Sugbo, mipasalig nga magpadayon ang subsub nilang kampanya batok sa tigbakay. Dugang ni Soriano nga ning panahon sa pandemiya gidili gihapon ang pagtapoktapok sama sa tigbakay nga peligro sa tinakdanay sa COVID-19. Gitug-an ni Colonel Soriano nga seryoso ang kapolisan sa lalawigan sa Sugbo nga puhagon ang bisan unsang matang sa gidili nga sugal.

Ang kapolisan daghan og nadakpan nga mga sugarol og manok tungod sa kooperasyon sa katawhan. Gituohan sa kapolisan nga mga asawa sa mga sugarol og manok ang misumbong kanila nga maoy hinungdan nga daghan sila og nadakpan sa tigbakayan.

Labing seguro nga kanunay nang wala mohatag sa ilang suweldo o kita ang mga bana ngadto sa mga asawa kay gipanugal maong gisumbong na sila.

Kun tinuod ang pagtuo sa mga polis nga ang mga asawa sa sugarol og manok ang misumbong kanila nga nakapadakop sa mga nagtigbakay, akong dasigon ang uban pa’ng mga asawa sa pagsumbong sa ilang bana nga sugarol og manok. Tungod sa gitug-an sa mga polis nga mga asawa sa sugarol og manok ang misumbong ngadto kanila, labing seguro naleksyon na niini ang mga bana nga sugarol nga dili mohatag sa ilang kita ngadto sa ilang mga asawa.

* * *

Gikiha sa tag-iya og tindahan ang nangawat og energy drink sa iyang tindahan nga nagkantidad og P12. Wala na papiyansaha sa piskaliya ang nangawat tungod sa kagamay sa kantidad sa Energy drink nga gikawat. Rason sa nangawat: tungod kuno sa iyang kawad-on. Tambal diay sa kawad-on ang energy drink.

Sakto ang gihimo sa tag-iya s tindahan. Sa kasong pagpangawat, dili ang kantidad sa gikawat ang basihan sa pagpasaka og kaso kun dili ang gihimong pagpangawat.