Pastilan gyud tawon

Dili na kinahanglang magpatabang pa sa publiko si Raquel Arce, ang hepe sa PROBE Team sa Dakbayan sa Sugbo, aron tudloan sila kon asa dapit mahimutang ang mga illegal swertres booth.

Wa ko makapugong sa pagkatawa dihang nabasa nako ang maong balita. Kon bukhon lang nimo ang imong mga mata ug mosuroy ka sa lainlaing dapit dinhi sa siyudad, makita ra gyud.

Apan akong klarohon, unsa may pangsakmiton sa PROBE Team? Ang una tingaling himoon ni Raquel Arce mao ang pagpangutana ni Mayor Edgar Labella kon unsay gisugo kaniya.

Lagmit moingon na sab si Raquel nga ang iyang pangsakmiton kadto rang mga booth sa illegal swertres nga anaa sa aseras gibutang.

Kon pananglit isibog kini sa mga tag-iya sa maong mga illegal swertres booth ngadto sa dapit nga dili na makabalda sa aseras, sakmiton ba gihapon?

Nahikatawa man gani ko sa report, ambot og husto ba sab, nga miingon si Mayor Labella nga ipasakmit niya ang mga illegal swertres booth nga milapas sa aseras.

Sa ato pa, kadtong mga kahon nga pinintalan og yellow nga anaa sa sulod ang mga sinuholan sa illegal swertres operators, dili na lang hilabtan kon wa kini sa aseras?

Sayod ko nga mapanagan-on kaayo ang atong mga opisyal nga mohimo’g aksyon niini kay dunay mga nag-operate og illegal swertres nga taga Davao City.

Inig kadungog nila nga Davao City mora na kini og makapahadlok kanila kay magtuo man sila nga ang maong mga tawo higala ni Presidente Duterte ug sa iyang banay nga may gahum nga manimalos kanila.

Ang tinuod, daghan kaayong mga operator karon sa illegal swertres nga ania sa Sugbo ug nagpatoo nga sila dunay koneksyon sa mga suod sa presidente didto sa Davao.

Kini tingali maoy rason nga mora’g nagkiyugpos ang atong kapolisan. Tiaw mo, gihatagan sa mayor og mando ang kapolisan nga paspasan ang kampanya sa illegal swertres, unya mohatag kanunay og report, naa ba?

Kon naa man, makadayeg kaha kita sa gidaghanon sa mga kahon nga ilang nasakmit? May nadakpan ba sila nga mga nagdumala sa maong illegal nga sugalan?

Sayon ra kaayong ilhon ang mga illegal swertres booth. Kini mao ang mga gagmay nga gahon nga way kahimanan nga makaisyu og printed ticket nga dunay number combinations.

Unya, nganong modawat man og pusta sa lotto ang maong mga STL outlets nga lahi man ang Small Town Lottery kay sa Lotto?

Wa kaha mo magkomedyahay lang aron ipatuo nga naghimo mo’g kampanya batok sa ilegal nga sugal, apan diay ang tinuod, nag-drama lang mo?