Lisud gyud kaayo ang panahon karon ug bisan kinsa nato sayod man gyud niani. Daghang mga tawo ang way trabaho, daghang mga tawo ang naglisud gyud financially. Daghang mga tawo ang nahimong aborido sa mga panghitabo rong mga panahona. Kining maong kaaborido usahay maoy nagtukmod sa uban aron hunoson ang ilang kaugalingong kinabuhi. Kini tungod kay walay lami alang kanila ang pagkinabuhi labina ning panahon sa dakong kalisdanan.
Usa sa akong mga parokyano nga akong gihangyo nga mamahimong kabahin sa Hermano ug Hermana nagkanayon nga buot gyud unt aniyang motabang apan gumikan sa kalisod mao nga ni-settle lamang siya sa pinakaubos. Ako siyang giingnan nga okay ra gyud ni kaayo. Kini tungod kay ang kalisod dili man babag sa pagsaulog og bisan unsa. Magsaulog lang sa gihapon bisan pa man diha sa kayano ug kapit-os kay dili lamang kini mahitungod lang sa pangilin. Gisaulog gyud nato mismo ang atong kinabuhi.
Daghan ang posibleng mahitabo sa us aka tawo sa panahon sa kalisdanan. Kini naglangkob ning mosunod:
1. Ang dugang kaisog nga manlimbasog aron mabuhi ug mamahimong mamugnaon. Diha sa kalisod matag tawo mamahimong maningkamot magamit lamang ang bisan unsang anaa.
2. Ang kaluya ug kawalay kapaingnan. Kini tungod kay ang kinabuhi usahay ingon man ang katawhan mayubiton man sa imong kaugalingong kapukanan.
Dili pa lang dugay nahimong viral didto sa kaulohan ang Maginhawa Community Pantry ug gani daghan ang nisuhid ning maong pamaagi. Alang nila maayo kini aron mabuhi ang matag usa kanato nga nagkinahanglan og makaon.
Subo lang palandungon nga dunay uban nga wala makasabot niini. Dunay uban mokuha apan walay gihatag. Kun mokuha pud og daghan sama pananglit sa usa ka tray nga itlog alang nila nga mahimong hinungdan nga maangkon ang pag bash sa tibuok Pilipinas.
Ang pagtabang sa uban karong mga panahona nagkinahanglan naman pud hinuon og permit. Mao na gyud ni tingali ang New Normal rong mga panahona. Kanus-a kaha nahimong requirement ang permit ang paghimo og maayo? Ambot lang kun unsay nahitabo ning atong palibot karon. Lisud gyud kaayo.
Apan bisan pa man niini padayon kita sa panlimbasog. Padayon kita sa paghimo og maayo taliwala ning dakong kalisod.