Sagbot nga makatunok

Ang kapolisan tigpatuman sa kalinaw ug kahusay. Tighipos sila sa mga sagbot sa katilingban. Ilang obligasiyon ang pagprotehir-tabang sa mga sibilyan nga nangadakin-as sa kadanglog sa kalibotan.  Apan, ambot, nganong may mga polis, bisag nasulod na sa ilang sako ang mga basura, matental man gihapon pagpunit sa nagkahugawng rosas aron kini pahimuslan?

Sama sa nahitabo niadtong usa ka 35-anyos babaye nga mireklamo sa gibuhat sa usa sa mga polis nga nadestino sa Sawang Calero Police Station, kinsa mipasangil nga gipanguwartahan ug gilugos kuno siya.

Matud niya, nga kalitkalit lang gironda sa kapolisan ilang balay sa Minglanilla ug pugsanon siyang gidala, gipriso ug gi-tortured sa sekretong bilanggoan sa maong police station sulod sa tulo ka adlaw.

Diin, dihang gibuhian na siya nga wala kasohi, gidala siya sa usa ka polis sa banko aron pawidrohon og P170,000. Tapos, gipakuyog sa motel ug didto sulod sa naghilak nga lawak, gilugos! Human molampos ang polis, didto pa buhii ug papaulia sa ilaha ang guwapang biktima.

Tapos masabwag kining hitaboa sa kamantalaanan, mitumaw ang laing reklamanteng babaye, kinsa gipriso sab ug gi-raped sa samang polis sulod sa giingong sekretong selda human pasanginling namaligyag illegal drugs.

Haskang kompiyansa sa polis!  Kay nagtuo mga babayeng ilang gipanakop makonsiderar nga mga sagbot sa sosyedad, diin mahimo rang yatakyatakan ug duladulaan, natental gyod ang polis pagpugnit niadtong dinakpang babaye kang kansang pamayhon ikaindig sa usa ka matahom nga rose.

Iyang gihagkan, gikumot ug gikuniskunis ang mga gihay aron tagbawon ang tawhanon niyang kahangol. Nalimot siya, nga ang maong bulak, bisan nahitipon na sa mga sagbot, adunay mga tunok nga makatunok sa linalang nga mapahimuslanon.

Tan-awa, unsay resulta? Hasta kaubang kapolisan, 11 sila tanan, ang gihuboan sa ilang katungdanan ug girelibohan human pasakaig kaso sa Integrity Monitoring and Enforcement Group, nga maoy gisumbongan sa mga babayeng nabiktima sa grabeng pang-abuso sa naasoy’ng kapolisan kang kansang binuhatan dili lang matang sa sagbot nga sa kaligdong makahugaw. Kondili, makatunok pa sa kalimutaw!

Hinuon, padayon pa ang pagpalawom sa imbestigasiyon. Hinaut unta, nga ang pinaleng desisyon fair and square. Ug makahatag og maayong pagtulon-an nga makapabag-o sa hitusra sa PNP. Gikan sa pagkasalawayon. Ngadto sa pagkadalayegon.