Ikatulong pulong Babaye ania ang imong anak, anak ania ang imong inahan (Juan 19;26-27)

Dunay mga butang nga malisod kaayo natong sabton. Nagtuo ta nga mahimong sulbaron nato ang tanang mga suliran labina kun maghisgot kita og financial o dili ba kaha relasyonal. Unsa naman lang kaha kun maghisgot kita og balatian nga wala na gyuy kaayohan. Ang bugtong mahimo nato mao na lang gyud tingali ang pagpatulo sa atong mga luha dungan ang pagbakho pamasin nga pinaagi sa atong mga luha makuhaan ang gihambing kasakitan. Kini usab ang nahitabo sa atong langitnong inahan. Atubangan sa krus sa mainit uyamot nga kaudtohon iyang gisud-ong ang inanay nga pagkabugto sa gininhawa sa iyang anak nga himatyon niadtong mga taknaa. Wala siya’y mahimo tungod kay kamandoan man sa kadagkoan sa lig-ong mga institusyon nga iyang anak pagasakiton ug kinahanglang patyon kay alang nila hulga siya sa katilingbanong seguridad. Ang bugtong nahimo sa maong inahan gawas sa pagpakaanaa bisan pa man tingali kun ang iyang hunahuna buot molingkawas sa maong talan-awon. Tingali buot siyang mohinumdom sa mga maanindot nga kasinatian sa gahapon kuyog sa iyang anak nga si Jesus. Ang ilang panaw sa Jerusalem matag tuig aron magsaulog sa pangilin apan ning tungora karon anaa sila sa Jerusalem apan ang maong panaw nagkkahulogan man diay og kamatayon.

Wala siya’y tingog sa kapasikaran nga siya babaye. Ang mga babaye kaniadto walay tingog ug dili paminawon. Ug sa maong kapasikaran dili gyud mahitabo nga duna siya’y mahimo sa pagbakyaw sa iyang kamot aron malangkat ang iyang anak gikan sa krus ug maluwas kini sa kamatayon. Supak man sa kabubut-on iyang gikuyogan ang iyang anak sa pag-antos niini sa pamasin nga ang maong presensiya makahatag og dugang kalig-on sa pinalangga niyang anak sa paghangop sa iyang kamatayon.

Si Maria dili huyang oo dili siya huyang. Lig-on siya kay nakasugakod siya pagsud-ong sa anak nga nag-antos ug samdan niadtong mga tungora. Nilahutay siya sa maong talan-awon dili tungod kay pintas siya nga pagka linalang. Nilahutay siya tungod sa iyang dakong gugma sa iyang anak nga iyang giunongan niadtong mga malisud nga takna sa pagtinga.

Isip usa ka inahan, akong naamgohan nga mahinungdanon ang tulo ka mga Ts sa kinabuhing malimbasogon.

1.  Una ang Time. Dili baya lalim nga motrabaho unya nanginahanglan pud nimo ang imong pamilya. Usahay hisaypan ka pang walay panahon alang nila. Kun nasayod pa lang sila sa imong gibati ug sa imong kahimtang. Dili gyud diay lalim.

2.  Ikaduha, ang Treasure diin aron mahatagan sa basic needs ang pamilya mokayod gyud kita aron lamang maka provide sa panginahanglan sa family members.

3.  Ikatulo ang Talent. Dili paigo ang mamahimong inahan lamang kinahanglan nga imong himoong creative ang pamaagi sa imong pagdala niini alang sa imong pamilya.

Ang kasaulogan sa 500 years of Christianity pahinumdom sa matag usa kanato nga angayan kitang mohatag og igong panahon sa pagtahod ug pag-atiman sa mga katungod sa atong mga kababayen-an. Si Maria ingon nga sanglitanan sa usa ka maayong babaye ug inahan unta mamahimong sama kaniya ang tanang mga inahan. Mga inahan nga dili mounay og patay sa ilang mga anak msimo sa ilang tagoangkan. Mga inahan nga dili monudnod sa ilang mga anak aron matun-as ang moralidad tungod sa salapi. Mga inahan nga dili gani maantigo motan-aw sa kahago ug effort sa ilang mga anak. Mga inahan nga dunay mga favorites ug mga inahan nga bisan pa man kun giilad na sa ilang mga anak padayon gihapong nagpailad tungod sa gugma. Apan tingali nabuhat nila nga mamahimong buta tungod sa gugma.

Pag-ampo

Ginoo salamat sa paghatag nimo kanamo ni Maria imong inahan nga maamong inahan usab. Tinuod daw sa mayhap ra ang mga pulong nga iyang nalibkas diha sa balaang kasulatan. Apan pabilin siyang mahinungdanon kaayo sa imong panaw. Salamat nga imo siyang gihatag ingon nga sanglitan. Salamat Ginoo, Salamat! Amen.