Unsa ang katumbas
Misugod na ang programa nga bakuna sa administrasyon ni Presidente Rodrigo Roa Duterte niadtong Lunes human miabot niadtong adlaw nga Domingo ang bakona nga gidonar sa China sa Pilipinas.
Miabot sa 600 ka libo ka doses sa bakuna nga hinimo sa Sinovac ang gidonar sa China diin ang usa ka gatos ka libo niini gitagana sa China alang sa mga sundawo ug personnel sa Pilipinas. Karong adlawa sugdan usab sa pagbakona ang mga medical frontliners sa Vicente Sotto Memorial Medical Center (VSMMC).
Unsa ang katumbas sa donasyon sa China nga bakuna? Mao kini ang pangutana. Ang tubag sa tigpamaba sa Malakanyang nga si Atty. Harry Roque mao nga kini unquantifiable o dili ma-quantify o walay katumbas nga salapi.
Si Presidente Duterte miingon nga walay gipangayo bisan gamay ang China sa ilang gidonar nga bakona dinhi sa nasud sa Pilipinas. Apan iyang gipaneguro sa nasud nga China nga dili niya tugotan ang Amerika nga makadala ug makapasulod og armas nuclear dinhi sa nasud sa Pilipinas kay kalapasan usab kini sa batakang balaud.
Ang administrasyon ni Presidente Duterte nakasugat og halapad nga pagsaway tungod sa kapakyas niini sa pagkondenar sa gihimong pagharihari sa mga sundawong Intsik ngadto sa mga Pinoy nga mananagat nga nanagat sulod sa mga isla nga iyaha sa Pilipinas tungod kay anaa kini sa iyang Exclusive Economic Zone.
Ang administrasyon ni Presidente Duterte igo lang nga nagpalingoglingog sa pagka agresibo sa mga sundawong Intsik sa West Philippine Sea bisan pa man sa kadaugan sa Pilipinas sa kasong gipasaka niini batok sa China sa Permanent Court of Arbitration sa the Hague niadtong Hulyo 2016 nga mibasura sa pangangkon sa China nga ila ang tibook China sea.
Ang hukom sa Permanent Court of Arbitration mideklarar usab nga ang mga isla sa Spratly, Pangsaniban Reef, Ayungin Shaol ug Recto Bank pulos nasulod sa Exclusive Economic Zone sa Pilipinas ug ang Panatag Shaol usa ka common nga fishing ground.
Ang gidonar sa China nga bakuna dili ba kini pangbayad sa Pilipinas tungod sa pagpalingoglingog lamang sa ilang pagharihari sa West Philippine Sea?
- Latest