Wa pay “side effects” sa bakuna

Hangtud karon, wa pa gyuy mga serious adverse effects ang gihimong pagpamakuna sa Sinovac ngadto sa mga frontliners dinhi sa nasud.

Giangkon sa kadagkoan sa Department of Health (DOH) nga dunay pipila nga nakasinati og mga mild effects, pero yano lang sama sa pagburotburot ra sa panit, ug pagsaka sa blood pressure.

Natural ra gyud nga dunay mga tawo nga makasinati og pagsaka sa blood pressure kay gikulbaan man sila nga ang gi-injection kanila makadaot sa ilang lawas.

Kinsa may dili mahadlok nga duna may gipang-post sa social media nga may mga nurse sa laing nasud nga namatay human gibakunahan og anti-COVID-19 vaccine.

Kon human sa unom ka buwan nga way ma-report nga grabeng epekto sa panglawas sa nato, makaingon na kita nga dili makadaut ang bakuna nga gihimo sa Insik.

Apan ang sunod nga isyu mao ang iyang prisyo nga pwerteng mahala, unya ang iyang kaepektibo dili kaayo kita makagarantiya nga dili ka na matakdan og COVID-19.

Buyno, pagkakaron nga dili pa kita maka-avail sa ubang anti-COVID-19 vaccine nga gihimo sa mga inila nga drug manufacturers, moagwanta lang usa ta sa Sinovac.

Apan kon anaa na gani ang mga bakuna nga gikan sa kasaligan gyud nga tighimo’g mga tambal, unya mas barato pa ang prisyo, nganong mopadayon man kita sa paggamit sa buhat sa mga Insik nga mahal?

Kon moabot na gani ang maong higayon unya ang kagamhanan moinsister gyud nga Sinovac ra gihapon ang paliton, aw klaro na kaayo ang ilang tumong.

* * *

Mireklamo si Erwin Gok-ong, ang chairman sa Cebu Market Vendors Cooperative (CEMVEDCO), kay may nagduda kuno nga midawat siya og suborno gikan sa Megawide aron mohilom ra sa isyu pagdumala sa maong pribadong kompaniya sa Carbon market.

Dili gyud hinoon kini tinuod kay nakaila ko ni Erwin Gok-ong nga dili siya magpakauwaw sa iyang kaugalingon aron himoon ang inyong gituohan.

Ang tinuod, yano lang nga tan-awon nimo si Erwin Gok-ong apan ang iyang kwarta ug katigayonan, makabuhi na kaniya bisan dili pa siya motrabaho ug magsige lang og suroy-suroy.

Gisuportahan ni Erwin Gok-ong ang pagmoderno sa Carbon Market, apan ang hangyo lang unta niya nga ang siyudad lang maoy mogasto aron nga dili mahadlok ang mga tindera nga moabot ang higayon nga momahal ang ilang bayranan.

Apan kon kabubut-on man gyud sa mga nagdumala sa siyudad, unsa may mahimo ni Erwin Gok-ong, gawas sa pagbagolbol ra gyud. Mao nga dili maayo nga inyo siyang dudahan nga midawat og suborno gikan sa Megawide.