Kini ang atong mahulagway sa Diosnong pagpintal. Tawhanong badlis mahiwi man gyud samtang Diosnong katikan tul-id pa sa bisan unsang tul-id nga bagis.
Apan sa mosugot kita ug sa dili ang kinabuhi sugilanong hiwi, kalipay, kasakit ug kalami.
Mao kini ang nahitabo sa usa sa akong mga trabahante dinhi sa among parokya. Ang katapusang simba mao diay kadto ang maisip natong signos sa taliabot nga panghitabo.
Dili tungod sa misa nga nahimong merida kondili tungod kay ang pagtambong sa Santos nga Misa usa man ka paagi sa katapusang pangandam alang sa taliabot nga pakigtagbo ni kamatayon ang kahimtang nga padulngan sa kadaghanan kanato.
Kini ang nahitabo ni Raylie Homecillo, akong pintor.
Ang pagdibuho, drawing musika ug ang pagdisenyo usa man ka paagi sa pagpadayag sa kaugalingon.
Ang pagpadayag sa kaugalingong hunahuna diha mahimong mas masabtan dili diha sa pulong nga usahay malisud kaayo dawaton kondili sa mga pulong nga gipaagi diha sa katitikan ug sa mga desinyo.
Kini tungod kay ang tawo puno man sa tanghaga ug misteryo.
Ang maong kasinatian sa kaugalingong kalainan maoy pagpadayag sa atong tawhanong han-ay diha sa maisip natong gubot nga kalibutan.
Ang atong mga kasinatian, kuyog sa mga masakit nga tiaw sa pagluib.
Ang biaybiay as mga sakop sa pamilya nga giisip untang atong kaabin.
Mga tawong kang kansang tumong mao man ang pagsibya sa atong mga sipyat.
Ang nahitabo ni Raylie wala lang nagpahinumdom kanato sa kadangog sa kalibotan apan sa laing bahin nagpahinumdom nato nga ang kamatayon anaa sa kanunay naggukod kanato.
Luoy ang kaayo kun dunay mahabilin. Sakit tungod kay usahay dili kita makapangandam.
Salamat kanimo Raylie ug salamat sa imong paghatag og kinabuhi sa karaang simbahan, sa kumbento, ug sa prayer room nga nahimong saksi usab sa imong panlimbasog aron ikaw mabuhi.