EDITORYAL - Magkinto ang China?

May kabalakang mitumaw kalabot niining pagpasar sa China sa ilang gitawag og Coastguard Law nga naghatag og gahum o pagtugot sa ilang coastguard paggamit og armas batok sa mga barko sa ubang nasud diha sa ilang teritoryo lakip na sa mga giangkon nilang teritoryo.

Natural ang maong kabalaka tungod kay mahimo kining pabilo sa pagulbo sa gubat tali sa China ug ubang mga nasud, ilabi na kun ang ilang biklon mga dagko sab nga mga nasud sama sa Amerika.

Peligroso kini kun dunay Chinese Coastguard captain nga mawad – an og kontrol ug mahinayak og gamit og pwersa. Dinhi sa Pilipinas, ang maong balaod naghatud og dili maayong mensahe para sa mga mananagat.

Wa pay klarong pamahayag ang gobiyerno kabahin niini. Ang administrasyong Duterte manggihigalaon kaayo sa China bisan pa niining mga pagpangilog ug pagpanglupig sa mga Chinese tungod kay duna siyay gustong makuha  kanila, ang mga proyektong pang imprastraktura.

Kaning balaora pagkatinuod mas peligro kaayo para sa ubang nasud apan dili tanto sa Pilipinas.

Sa pagkakaron maayo ang relasyon sa liderato sa duha. Usa pa, ang China dunay investments nga gibubo dinhi sa Pilipinas.

Kani mao ang mga proyektong imprastraktura sa build, build, build program sa administrasyon nga diin dako sila og maginansiya sa interes.

Bisan tuod dugay kaayo ug nalangan silang nakatuman sa ilang saad pagtabang kang Duterte, blyones ka pesos na nga proyekto ang nasugdan nila og bubo sa nakalabay nga mga tuig. Kung magbinuang ang China ug masakitan ang garbo sa mga Pilipino unya moresulta hinuon sa pag-aslom sa relasyon o simbako magkagiyera na hinuon, mas dako ang mawala kanila.

Siguro karkulahon sa China ang paggamit niining ilang balaod tungod kay sayod silang dili nila kini kayang ipamugos.

Sa mata sa kalibotan dili sila mao ang  legal nga tagiya sa South China Sea ug East China Sea, lalisunon pa. Maayo ganing gamiton kining balaora batok sa China diha sa kadagatan aron patumaron sila sa tambal nga angay kanila.