Napukaw ang virus

Matud sa uban nga dili gyud magpalupig ang dakbayan sa Sugbo sa bisan unsa. Kinahanglan gyud mosibaw gyud sa bisan unsa nga panghitabo sa nasud ug karon tataw kaayo nga miapas gyud ang syudad ug ang probinsya sa isyu sa COVID-19.

Kanunay maapil sa top 5 ang Cebu City sa adunay daghang kaso sa coronavirus disease tungod sa paspas kaayo nga pagsaka sa gidaghanon sa mga tawo nga nataptan sa naasoy’ng balatian.

Gani kagahapong adlawa lang dul-an na sa usa ka libo ang active cases sa Cebu City diin mo-average og kapin sa 40 ka kaso matag adlaw ang ilang Ma-record.

Niadtong nakalabay’ng adlaw 97 ang bag-ong kaso nga hapit na mag three digit ang coronavirus cases nga susama sa nahitabo niadtong pagsugod sa pagkatap sa virus sa dakbayan nga nahimong COVID-19 epicenter.

Nagmalamposon ang siyudad sa pagsumpo sa virus nga gitawas nila og flattended the curve tungod usab sa pakig-alayon sa mga otoridad ug sa katawhan mismo nga bisan sa sinugdanan gahi kaayo ug ulo hangtod gipadad-an og mga sakop sa Special Action Force kon SAF.

Hilabihan ka higpit ang lagda kaniadto nga nakamugna usab og kahasol sa mga tawo ilabi na kadtong gikinahanglan nga manginabuhi kada adlaw apan nagbunga ang tanan kay napagamay man ang kaso sa COVID-19 nga naa ganiy adlaw nga usa, duha, tulo o single digit lang ang matala kada adlaw.

Medyo nakapaluag sa gibating kalisang ang ingon niini nga update hangtod nga miabot ang kalagkalag nga bisan og gisirad-an ang mga sam-ang apan duna gihapoy mga tawo nga didto sa ilang komunidad nagtapok tapok nga maoy sinugdanan sa paglihok na sa virus.

Gisamotan pa sa pag abot sa Disyembre nga daghan kaayo ang mga kalihokan hangtod na sa Enero diin naa usay mga kalihokan apan nasanta ra usab dayon.

Makahinuktok kita usahay nga unta wala nalay mga kalihokan sama sa party dili unta mabutang og balik ang Sugbo sa COVID-19 map. Unta napadayon ang mga restriction nga mahimo ra gyud unta bisan ipadayon ang panginabuhian.

Karon unsaon naman lang kung dili na mapagkang ang subling paglupad sa mga kagaw? Makasugakod pa ba ang kagamhanan nga wala namay pondo nga ikasuporta sa mga tawo ugaling subling higpitan ang quarantine status.

Dili pa uwahi ang tanan, mamahimong makabalik kita sa atong nasugdan kong magpakabana kitang tanan.

Subling nahigmata ang kagaw nga mas mipalig-on pa tungod sa pagpasagad sa mga tawo ug ang makabuntog lang niini ang atong partisipasyon nga mao ang pagsunod sa mga protocols.