McGregor-Pacquiao fight gikahinaman

Wala nay angay’ng ikapamatuod si Pambansang Kamao, Senador Manny Pacquiao, kon bahin na sa kinsay ilhong Greatest Of All Times (GOAT) nga boxer sa tibuok kalibotan.

Sanglit, usa man siya sa gipili sa mga boxing fans ug nahitalay saTop 10 nga mao kining mosunod: 1) Muhammad Ali, 2) Sugar Ray Robinson, 3) Mike Tyson, 4) Manny Pacquiao, 5) Rocky Marciano, 6) Joe Louis, 7) Sugar Ray Leonard, 8) Floyd Mayweather Jr., 9) Henry Armstrong ug 10) Roy Jones Jr.

Hinuon, base sa nahipos nga ranking list ni Martin Reichert sa BoxRec, ania ang GOAT Top 5 as of September 29, 2020: 1) Floyd Mayweather Jr., 2) Manny Pacquiao, 3) Carlos Monzon, 4) Muhammad Ali ug 5) Sugar Ray Robinson.

Sayod si Reichert nga daghan ang motutol niining maong pagkapili, labi na ang milyonmilyong fans nga kanunayng nakakita sa sukol-dagang inayawan ni Floyd Jr. Hasta si two-time UFC champion Conor McGregor, nakasaksi sab niadtong Mayweather-Pacquiao nga away.

Gani, nasangka sab niya si Floyd  didto sa T-Mobile Arena, Paradise, Nevada niadtong Agosto 26, 2017.  Mirekord og maoy ikaduhang kinatas-ang  pay-per view buys sa kasaysayan ang maong panagsangka, bisag klaro kaayong pilde daan sa tapad si Conor batok ni Floyd Jr.

Kutob ra sa ikanapulong round si Conor, human gi-TKO ni Mayweather sa tumang kasayon. Pero ang kita nga ilang nadawat? $280M ang nabolsa ni Floyd samtang $130M ang kang Conor.

Human matilawi ni McGregor ang mga kumo ni Mayweather, gusto sab niyang tilawan ang kang Pacquiao.  Ug gidawat sa atong Pambansang Kamao ang maong hagit-pamarayeg.

Niining tuig 2021, sa Abril o pataas, posibleng mahitabo ang engrandeng McGregor-Pacquiao fight ibabaw sa ring.

Dinhi makomparar unya ni McGregor, kinsa nila ni Manny ug Floyd ang adunay mas mga kusog suntok, ang mas sayong mopahapla niya sa kanbas, ang mas dakong mokitag halin sa pay-per-view ug ang makahatag og mas taas nilag premyo human sa away?

Mao kini ang gikahinamang yugto nga gipaabot sa tanang boxing fans. Sanglit mopruyba ang unsay resulta niini, sa pag-ila kon kinsa nila ang angayang ibutang sa mas taas  puwesto  sa world’s greatest boxer at all time: si Floyd ba, o Manny? Unta, madayon kini.