EDITORYAL - Bakuna ug ang Barangay

Gipaabot nga dunay dakong papel ang mga barangay sa pagpahigayon na unya aning dugay na kaayong gipaabot nga mass vaccination.

Sama sa pagpangapud-apod sa Special Amelioration Program sa gobiyerno para sa mga tawong naapektahan sa pandemiya, makatabang og dako ang mga barangay ini og sugod na niining pagpamakuna.

Kinahanglan lamang nga ang  Department of the Interior and Local Government momando sa mga barangay sa pagtabang unya sa Department of Health sa ilang operasyon.

Maayo lang sab unta og tarungon sa mga barangay ang paglista kun kinsa ang angayang unahon sa pagbakuna.

Kahinumdoman nga nagkaguliyang ang pipila ka mga barangay human dunay mga opisyales niini nga nagkunsabohay sa iregularidad sa pagpangapud-apod sa SAP. Dunay uban nga gipili lang ang gihatagan ug gipalabi ang ilang tigpaluyo, dunay gikibrahan ang SAP sa benepisaryo, dunay gitunga ang SAP aron duha maoy mahatagan ug daghan pang gipanghimo nga wala nasubay sa balaod.

Tungod sab niini, daghang opisyales ang nagatubang karon og mga kasong administratiba ug kriminal tungod sa kahiwian.

Ang mga barangay maoy kinagamyang organisasyon sa pangamhanan o kinauyokan sa pangamhanan sa gobiyerno.

Nakaila sila sa ilang mga tagsa-tagsa ka mga konstituwente. Apan usahay mao sab kini ang hinungdan kun nganong duna silay gipabor-paboran, ilabi na kadtong duol sa ilang dughan o mga supporters sa partido politika.

Manghinaut lang kita nga ini og sugod na unya sa massive vaccination campaign way iregularidad nga mahitabo.