Nahimong dakong hagit sa kalibotan ang tuig 2020 tungod sa pandemiya sa coronavirus disease nga mikalas og daghang kinabuhi ug mipakamang sa mga ekonomiya dili lang sa mga gagmay ug kabus nga mga nasud kondili hasta sa mga adunahan ug gamhanang mga nasud.
Ang tuig 2020 daghan og gibiling leksyon sa tanang ang-ang, gikan sa panggobiyerno hangtud sa tagsatagsa ka indibidwal nga dili makalimtan, kabus man o adunahan. Dunay mga pagkulang nga kinahanglan gyud diay pun-an ug duna say naghinubra nga kinahanglan diay menusan.
Sa gobiyerno, tanan mga ahensiya wala makapanapo. Mikilat na ayha pa nakapanguros. Daghang mga pagsaway ug gibasol ang gobiyerno sa kawala niini klarong pangandam ug aksyon aron kapugngan ang pagkatap sa maong sakit. Maayo nalang nga dunay kwartang pundo, kay bisan dili tanan nahatagan og ayuda ug daghan ang mga kontrobersiya nakapalahutay kini ilabi na sa mga kabus.
Nakita sab sa tuig 2020 nga bisan dunay pandemiya ug daghan ang naglisod, duna gyud gihapoy mga tawo o politiko nga nakaako pa gihapon sa pagpamolitika ug paggamit sa sitwasyon alang sa ilang personal nga interes bisan layo pa ang piniliay, klaro kini kaayo sa mga lokal nga senaryo.
Sa mga tawo, maayo unta og nakat-onan na nila nga mahimo ra gyud diay magpuyo nga simple. Way lulinghayaw ug menus ang gastos. Nakat-on usab unta ang mga walay trabaho kun unsa ka importante diay ang dunay trabaho sa panahon nga dunay katalagman. Sa mga nanarbaho nga nawad-an og trabaho tungod sa pandemiya nagbilin kini og pait nga lasa sa ilang dila ug maayo unta og duna silay leksyong nakat-on gikan niini.
Karong bag-o bisan wala pa motak-op ang hugna sa pandemiya sa COVID-19 duna na say laing hagit nga nagpaabot sa ganghaan, kining UK coronavirus variant nga giingong mas paspas o mas daling manakod kun itandi sa COVID-19.
Ang nakaayo lang niini, nakapangandam na ang katawhan pinaagi sa leksyon gitudlo sa COVID-19. Kadtong mga wala wa maminaw ug wala magpakabana, sila ra sab maoy alaot karong tuiga. Kinahanglang motubo ug magbunga og maayo sa panumdoman sa tawo ang tanang leksyon nga gitudlo sa pandemiya aron sa sunod nga dunay susamang katalagmang moabot dili na tanan makuratan, makahibalo na kun unsay angay buhaton ug kun asa magsugod, dili na maghapuhap sa ngitngit.
Gikan sa kinatibuk-ang pwersa sa Banat News, mainitong pagtimbaya pagsugat sa Bag-ong Tuig kanatong tanan!