Wala gyud siya mangangkon

Disyembre 13, 2020: Ikatulong Domingo sa Adbiyento

Mga Pagbasa: Is. 61;1-2,10-11/Lk. 1/1 Tes. 5;16-24/Jn. 1;6-8,19-28

Kini mao ang gipakita nga taras ni Juan Magbubunyag. Bisan pa man kun tinuod naka-gain na siya og following apan uban ang dakong kamapaubsanon, iyang giangkon nga dili siya mao ang Mesiyas.

Ang maong pagpangangkon tingali naka dismaya sa mga tawo nga nagtuo nga siya na gyud ang Mesiyas sanglit niadtong mga higayona, giuhaw ang matag tawo sa tinuod nga pangulo nga maoy mopalingkawas kanila gikan sa kaulipnan sa mga  Romanhon nga maoy nisakop kanila niadtong mga higayona. Kini ang hinungdan kun nganong padayong nangindahay sila sa usa ka Mesiyas.

Karong Dominggoha gitawag sa mga liturhista ingon nga Dominggo sa Gaudete kun ang Dominggo sa Pagmaya.

Kining maong pagmaya angayang saulogon dili man tuod diha sa tumang kagahob kay gumikan ning COVID-19 nahimong limitado man ang atong mga lihok. Apan angayan gihapon kitang magmaya kay tungod karong mga panahona haduol ang Ginoo ug taliabot na ang kaluwasan.

Ning maong panahon sa dakong kalisdanan angayan gihapon kitang maglipay tungod  kay duna kitay mga maayo gihapong nahimo bisan pa  man kun dunay mga tawo nga padayong motamay sa atong mga paningkamot alang sa kalamboan.

Balik kang Juan Magbubunyag. Si Juan Magbubunyag dunay nindot nga pagtulon-an alang sa matag usa kanato. Kini naglangkob ning mosunod:

1. Ang pagkahimong tataw kun klaro sa atong tagsa tagsa ka mga roles sa kinabuhi. Kun dili nimo role ayaw panghilabot.

2. Ayaw pangangkon sa bisan unsang achievement nga nahimo ni bisan kinsa. Daghan ra bang mga tawo nga ingon ining matanga.

3. Pasultiha ang imong binuhatan ug dili ang imong pulong.

Kay dunay ubang mga tawo nga puno sa pagarpar apan halayo ra kaayo sa binuhatan.

Gibawal ang pabuto ingon man ang tarotot. Makaingon tingali ang kadaghanan nga mingaw ang pasko apan alang nako maayo ra pud.

Kini aron sa ingon mas maka focus ang tanan diha sa pagpamalandong ug sa pagpamalandong ug pag-ampo.

Lisud ning way focus kay sa ubang tawo mo-focus ug mao ra baya gyud ni ang nahitabo ning mga panahona karon. Tungod ba kaha sa pandemic daghang mga tawo ang nagpunay na lang og panghimantay sa ilang isig kaingon.

Wala nila makita nga si Jesus nianhi dili aron motan-aw lamang sa mga hiwi nga anaa sa katilingban kondili sa pagpangita og sulbad sa bisan unsang suliran.