Giuhaw sa pulong sa Dios

Taliwala sa kalisang ug kahadlok nga gibati sa mga tawo sulod sa walo ka buwan gumikan sa COVID-19 pandemic, wala kini makapahuwas sa gibating kauhaw nga gibati sa katawhan sa espiritohanon nga katagbawan.

Nalaming ang tanan human gipatuman ang pag pig-ot sa kagawasan sa mga tawo aron mapugngan ang pagkuyanap sa virus diin gipapuyo sa mga pinuy-anan kadtong walay tuyo nga importante sa gawas ilabi na ang mga bata ug tiguwang.

Gihunong ang physical nga pagtambong sa misa sa mga simbahan nga sukad sa atong kasaysayan wala mahitabo apan tungod sa pandemiya nahitabo gyud.

Sa kataas sa panahon nga nagpuasa ang atong kalag sa espiritohanong kalan-on daw naghigwaos na kini karon ilabi na sa nagsingabot nga Misa de Gallo.

Bisan sa kahadlok, ang mga tawo wala matarog nga nagpanikad na nga motuman sa mga panaad kay ang kadaghanan adunay mga personal nga katuyoan sa ilang pagkompleto sa siyam ka kaadlawon nga gitoohan sa uban mahatagan og katumanan.

Karon pa lang daw gikakit-an ko na ang mga tawo nga modagsa sa mga simbahan diin ipahigayon ang Misa de Gallo aron matambalan ang gibating kauhaw sa kalag.

Dili nato mabasol o mahukman ang mga tawo nga padayong mipalig-on sa ilang pagtuo kay katungod nila kana. Igo lang mopahinumdum seguro ang mga otoridad sa mga angayan ug dili angayan nga buhaton.

Ang tanan anaa ra sa mga kamot sa mga manimbahay unsaon nila sa pagpanalipod ang ilang kaugalingon batok sa virus nga naghuwat og binta aron makatakod.

Moingon ang ubang manimbahay nga gisalig ang tanan sa Ginoo nga maoy manalipod kanato, dili gyud na makwestyon kay ang Dios ang atong manluluwas.

Apan gikina-hanglan sad nga mohimo kita sa atong share sa pagpanalipod sa kaugalingon, pareha sa giingon nga “Lihok tawo kay tabangan ko ikaw.”

Bisan unsaon nato sa pag-ampo kong wala kita mohimo sa atong kabahin nga mapanalipdan gikan sa problema, wala gihapoy kapuslanan kay ang pag ampo ubanan gyud sa buhat.

Dungan sa pagtagbaw nato sa kauhaw sa atong kalag, seguradohon usab nato nga magpabiling lig-on og dili maunsa ang atong lawas kay mao kini ang templo sa Dios.